VOV4.Jarai - “Hlâo adih ta kơnong kơ hmâo mlăm hăng dlai tlô. Ră anai ta hmâo tơhrơi, hmâo adai, hmâo ia rơsĭ. Hang ia rơsĭ ataih, klă hiam, ta khom thâo wai lăng ñu”. Tơlơi pơtă mơng Khua mir sir Hồ Chí Minh lom nao čuă Ling tơhan ia rơsĭ blan 3/1961 dưi hmâo khua tơhan, ling tơhan ia rơsĭ lăi hrom, khul tơhan ling tơhan Kual mrô 4 Ling tơhan ia rơsĭ lăi ha jăn djă pioh, jing jơlan nao kơ djop bruă mă. Hrăm, ngă tui Wa, rim khua tơhan, ling tơhan Kual mrô 4 Tơhan ia rơsĭ hmâo laih lu hơdră ngă phrâo, hơdră ngă klă, pơčeh phrâo, ba glăi bôh tŭ yua, hmâo pran lar hyu prong, dưi mă yua sit nik ba glăi bôh tơhnal prong amăng bruă pơhrăm bơblah, pơgang kơjăp ia rơsĭ pô mơng Lŏn ia.

Bưp Trung úy Nguyễn Đình Lương, Khua apăn bruă phao kơnong ƀat tô, Anom pơphô bruă, Lữ đoàn 162 lom ñu glăk lăi pơthâo mă yua măi mok “Hơdră rơnăk măi mok pơyiong phao kơnong AK-176 ƀơi ƀat tô 12418” kơ ƀing khua tơhan, ling tơhan ƀăt tô... Anai lĕ măi mok yua kơ ñu kơsem min hăng dưi mă yua ƀơi ƀăt tô amrom phao apui kơsung blah tañ 12418 ba glăi bôh tŭ yua prong. Ayong Lương brơi thâo tơbiă rai mơng bôh nik bruă mă ƀơi ia rơsĭ, juăt bruă phao kơnong ƀăt tô AK-176 jing ƀut phao kơnong rơnuk anai dưi dưm truă tui lu mơta. Lăng ƀuh bruă pơhrăm kơsem min hră pơ-ar hăng hơdôm măi mok, rŭp rơđah rơđông amra gêh gal, pơjing rơnoh klă hăng djru ling tơhan thâo, tŭ mă djă pioh tañ hloh. Yua anun, tơdơi kơ 3 blan kơsem min, găn rơgao lu tơlơi tơnap, ñu hmâo pơjing laih hơdră mă yua djru kơ ling tơhan amuñ kơsem min hăng mă yua, rơnăk djop mơta phao kơtoang ƀơi ƀăt tô, djru bruă pơhrăm hăng ngă pô phao kơnong AK-176. Črăn mă yua hmâo mă pri A apah bơni hlăk ai pơčeh phrâo Nguyễn Phan Vinh thun 2021 mơng Khul tơhan ia rơsĭ. Trung úy Nguyễn Đình Lương lăi pơthâo:

“Drơi pô pơsit kiăng ngă pô hơdôm bôh ƀăt tô rơnuk anai khom pơčeh phrâo, khin pơmin, khin ngă. Pơ̆ anăp anai kâo djă pioh kơjăp hăng tui bôh than dưi ngă, hrăm tui klă, pơđĭ tui bôh thâo bruă kơđi čar kơ pô, bôh thâo bruă mă kơ pô, ngă giong klă djop bruă mă hăng pô mă. Ngă tui pran ba jơlan hlâo, pơčeh phrâo mơng hlăk ai, kơsem min dong bôh thâo, pơčeh pơkra, mă yua măi mok kơ bruă pơhrăm djru pơdŏng Lữ đoàn 162 Hơkrŭ, tui phiăn pơkă, hơdeč hmar, rơnuk anai djơ̆ tơlơi tơlơi pơgang kơjăp bul ia rơsĭ pô, lŏn ia yôm phăn mơng dêh čar amăng rơnuk phrâo.”

Lăi pơthâo ling tơhan phrâo ƀơi Anom pơhrăm tơhan Kual 4 Tơhan ia rơsĭ

Ngă tui Tơlơi črâo ba 05 mơng Ding jum kơđi čar kơ “Pơtrut kơtang bruă hrăm hăng ngă tui tơlơi pơmin, pran jua, kơnuih Hồ Chí Minh” ƀơi Kual mrô 4 Ling tơhan ia rơsĭ hmâo laih lu mơnuih ngă gru hlâo hăng hơdră ngă phrâo, pơčeh phrâo, ba glăi bôh tŭ yua amăng djop bruă mă. Hăng sa čô ngă pô djru bruă Grŭp apăn bruă phao kơtoang, Anom bruă măi mok, Thượng úy Trần Công Tạo ƀu pơdơi kơsem min, gum hơgôp hơdôm tơlơi pơčeh phrâo, pơplih pơkra măi mok, djru pơđĭ tui bôh thâo mă yua phao kơtoang rơnuk anai ƀơi puih kơđông. Rơđah biă ñu kah hăng pơčeh “Măi djru dar măi pơnah amrom ƀat tô Gepard 3.9”, pơčeh phrâo hmâo pơsit yôm bôh tŭ yua amăng pok pơhai mă yua sit nik. Tơlơi pơčeh phrâo anai hmâo mă pri mrô sa bruă Pơplông “Hlăk ai pơčeh phrâo gah khul ling tơhan”, Thượng úy Trần Công Tạo lăi pơthâo:

“Anai lĕ djuai măi mok dưi dăp hơdră, pơkra phrâo tui bôh than djru mă yua ring măi pơnah amrom ƀăt tô, djru pơđĭ tui bruă blah mơng ring măi pơnah amrom phao; djru bruă pơhrăm blah, hrom hăng anun plai ƀiă rơngiă pran ling tơhan lom mă yua phao kơtoang. Drơi pô kâo gir run hrăm tui, pơđĭ tui bôh thâo bruă mă, hơduah ĕp phao kơtoang phrâo, hơdră mă yua phrâo mơng anun ruah mă kơsem min, mă yua amăng bruă mă, djơ̆ tui tơlơi kiăng yua jai hrơi jai prong, djru pơgang ia rơsĭ, bul ia rơsĭ pô amăng rơnuk phrâo.”

Hăng ƀing tơhan glăk mă bruă ƀơi bul ia rơsĭ Trường Sa, ataih mơng lŏn drŏn, tơlơi hơdip tơnap samơ̆ khua tơhan, ling tơhan djă pioh na nao tơlơi pơtô mơng Wa Hồ. Trung tá Phạm Quốc Hùng, khua apăn bruă tơhan Bul ia rơsĭ Sơn Ca, Lữ đoàn 146 lăi pơthâo: Rim khua tơhan, ling tơhan ƀơi bul ia rơsĭ hrăm hăng ngă tui gru hiam pran jua Hồ Chí Minh ƀơi hơdôm bruă mă rim hrơi. Mơng bruă pơkrem apui lơtrik, ia yua truh hơdră pla añăm, bơwih brơi kơ phun pla ƀơi dlông čuah hăng san hô ƀudah thâo kơjăp jơlan nao, weh hyu kiăng pơtô brơi neh wa hyu mă akan hơdang pơhlôm klă. Hăng bruă pơgang bul ia rơsĭ pô, rim khua tơhan, ling tơhan pơjing pran gơgrong pô amăng pơhrăm, ngă tui tơlơi phiăn pơkă, kiăo tui bruă mă mơng anom, lăi nao hrom hăng bruă mă. Trung tá Phạm Quốc Hùng pơsit:

“Ngă tui tơlơi pơtô mơng Wa, hơdôm hrơi rơgao, drơi pô hrom hăng khua tơhan, ling tơhan amăng puih kơđông hrăm tui klă na nao, pơđĭ tui tơlơi pơmin bruă kơđi čar, thâo rơđah mơnuih, bruă mă hăng hơdôm tơlơi pơmin, tơlơi pơkă mơng Ping gah, Kơnuk kơna ta amăng ngă tui bruă pơgang ƀơi ia rơsĭ, bul ia rơsĭ pô. Pơhrăm klă, ngă pô djop mơta phao kơtoang, pơhrăm jơlan gah mă bruă, kơđiăng, pơsir klă djop tơlơi amra truh, ƀu pioh truh kah mơng ngă, ƀu pioh dô̆ kơtuă amăng djop tơlơi.”

Khua tơhan, ling tơhan Kual 4 Tơhan ia rơsĭ wai lăng bul ia rơsĭ

Tui hăng Khua tơhan Ngô Văn Thuân, Khua git gai Ping gah Kual 4 Tơhan ia rơsĭ: Ngă tui Tơlơi Črâo ba mrô 05 mơng Ding jum kơđi čar “Pơtrut kơtang bruă hrăm hăng ngă tui tơlơi pơmin, pran jua, kơnuih Hồ Chí Minh”, hơdôm thun rơgao, Kual mrô 4 Tơhan ia rơsĭ hmâo laih lu bôh tơhnal sit nik. Lu tơlơi pơčeh phrâo dưi mă yua amăng bôh nik ba glăi bôh tơhnal prong amăng bruă pơhrăm blah, pơgang kơjăp bul ia rơsi, ia rơsĭ Lŏn ia pô.

“Khom pơsit hơdôm hrơi rơgao hrăm tui tơlơi pơmin kơnuih pran jua Hồ Chí Minh mơng Kual 4 Tơhan ia rơsĭ hmâo lar hyu, ngă pơhư̆č lu khua tơhan, ling tơhan gum hrom. Bôh tơhnal mơng hơdôm hơdră mă yua hăng pok pơhai sit nik hmâo pơtrut laih tơlơi kơsem min, pơčeh phrâo mơng khua tơhan, ling tơhan amăng puih kơđông, mơng anun djru pơđĭ tui bruă pơhrăm, prăp lui blah wang mơng abih bang Kual. Rim khua tơhan, ling tơhan Kual 4 Tơhan ia rơsĭ hmâo pran jua bruă kơđi čar khop, kơjăp phik, khin pơmin, khin ngă, khin gơgrong, khin pơplih phrâo, pơčeh phrâo, pơsit pran jua pơgang kơjăp bul ia rơsĭ, ia rơsĭ Lŏn ia pô.”

Djă pioh tơlơi Wa Hồ “Hlâo adih ta kơnong kơ hmâo mlăm hăng dlai tlô. Ră anai ta hmâo tơhrơi, hmâo adai, hmâo ia rơsĭ. Hang ia rơsĭ ta ataih, klă hiam, ta khom thâo wai lăng ñu”, rim khua tơhan, ling tơhan Kual mrô 4 Tơhan ia rơsĭ gir run, pơhrăm. Amăng hơdôm bruă mă hơpă leng kơ gum hrom hơbit, hơkrŭ pơsir tơlơi tơnap, amra gơgrong kơdŏng glăi pơgang kơjăp ia rơsĭ, bul ia rơsĭ Lŏn ia pô./.

Thu Lan: Čih – Siu H’ Prăk: Pơblang