Khua tơring čar Dak Lak čuă, hơ-ưč hmưi Jơnum prong Phơ̆t đản thun 2025
Thứ bảy, 06:00, 10/05/2025
VOV Tây Nguyên/Siu H' Prăk pơblang
VOV Tây Nguyên/Siu H' Prăk pơblang
VOV4.Jarai - Ƀrô djơ̆ hrơi Jơnum ngă yang Phơ̆t đản – Phơ̆t lịch 2569 – Tui thun ta yua ră anai lĕ 2025, mơguah tom brơi (09/05), grŭp hyu mă bruă mơ̆ng Ping gah tơring čar, Khul khua pơ ala mơnuih ƀôn sang, Jơnum min mơnuih ƀôn sang, Jơnum min djop djuai ania mơnuih mơnam dêh čar Việt Nam tơring čar Dak Lak hmâo nao čuă, hơ-ưč hmưi Grŭp git gai bruă Khul đăo phơ̆t Việt Nam tơring čar hăng sa dua anih anom jơnum sang phơ̆t ƀơi Buôn Ma Thuột.
Ƀơi hơdôm anih nao čuă, khua tơring čar Dak Lak hmâo lăi pơhing tañ kơ tơlơi bơwih ƀong mơnuih mơnam mơ̆ng plơi pla amăng thun rơgao, hơdôm pơplih phrâo amăng dưm dăp anom mă bruă čar ră anai. Khua tơring čar hmâo čih pioh hăng pơsit yôm hơdôm gum hơgôp mơ̆ng Khul đăo phơ̆t pioh kơ bruă pơgang, pơdŏng hăng pơđĭ kyar lŏn ia hăng plơi pla.
Khua tơring čar Dak Lak lăi lĕ, hăng pran pơsit mơ̆ng ƀing yă yơng ơi phơ̆t, mơnuih tui đăo, Grŭp mă bruă Khul đăo phơ̆t Việt Nam tơring čar Dak Lak hmâo dong hơdôm gum hơgôp sit nik, kơtưn gum hrŏm hơbit, mut hrŏm pioh pơdŏng tơring čar jai hrơi jai pơdrŏng asah klă hiam./.
Viết bình luận