VOV4.Jarai - Amăng hơdôm hrơi akô̆ thun phrâo, khua git gai Ping gah tơring čar, Jơnum min mơnuih ƀôn sang hăng Khul pơ ala mơnuih ƀôn sang tơring čar Daklak hmâo nao čuă, bưp ƀô̆ mơta sa dua sang bruă, anom bruă ƀơi tơring čar kiăng pơsur, pơtrut pran jua hơdôm bôh anom găn rơgao tơlơi tơnap đĭ rơnoh bruă bơwih ƀong huă.

Khua git gai Ping gah tơring čar Daklak ơi Nguyễn Đình Trung lì xì akô̆ thun kơ mơnuih mă bruă mơng Sang bruă pơkra Biêr Sài Gòn – Kual Tŏng Krah dêh čar

Rơđah iă ñu, hơdôm grŭp hyu mă bruă mơng Ping gah tơring čar, Jơnum min mơnuih ƀôn sang hăng Khul pơ ala mơnuih ƀôn sang tơring čar Daklak hmâo nao čuă tơña bla hăng bưp ƀô̆ mơta akô̆ thun hăng mơnuih apăn bruă, mơnuih mă bruă Sang bruă pơčruh prăk hrom sĭ mơdrô ia xăng ia jâu Nam Tây Nguyên, Sang bruă kơ phê Thắng Lợi, Sang bruă pơčruh hrom prăk sĭ mơdrô pơsơi Đông Nam Á hăng sa dua bôh anom pơkra gơnam tam amăng tơring čar. Ƀơi Sang bruă pơkra Biêr Sài Gòn – Kual Tŏng Krah dêh čar, ơi Nguyễn Đình Trung, Khua git gai Ping gah tơring čar Daklak hrom hăng grŭp hyu mă bruă hmâo hmư̆ tơlơi lăi pơthâo glăi tơlơi mă bruă mơng Sang bruă, hyu čuă kual pơkra gơnam tam hăng bưp ƀô̆ mơta ră ruai hăng mơnuih mă bruă. Khua git gai Ping gah tơring čar Daklak pơsit yôm hơdôm tơlơi gir run mơng Sang bruă lom yak rơgao hơdôm tơlơi tơnap yua klin ngă kiăng pơhlôm bruă ngă rai gơnam tam, ƀu hmâo hlơi ƀă kơman Covid-19./.

Siu H’ Prăk: Pơblang