VOV4.Jarai - Amăng 2 hrơi lơ 25 hăng lơ 26.8, ƀơi plơi prong Buôn Ma Thuột, tơring čar Daklak, Khul apăn bruă djuai ania gah Khua pơ ala mơnuih ƀôn sang dêh čar ta tal 15 pơphun jơnum abih bang tal 4 kiăng pok pơhai hơdôm bôh yôm pioh kơ tal jơnum lok 4, Khua pơ ala mơnuih ƀôn sang dêh čar ta tal 15 hăng pel ĕp gum pơhiăp sa dua bôh yôm bơdjơ̆ nao truh Jơlan hơdră pơkă mơng lŏn ia pơđĭ kyar bơwih ƀong mơnuih mơnam kual neh wa djuai ania ƀiă kual čư̆ siăng rơwang 2021-2030, akô̆ bruă pơplih phrâo, pơđĭ tui anô̆ klă, bôh tơhnal mơng Khul apăn bruă djuai ania, bơkơtuai gum pơhiăp kiăng pel ĕp Rơwang bruă Tơlơi phiăn lŏn dron pơplih pơkra.

Pơhiăp pok phun mông jơnum, ơi Y Thanh Hà Niê Kdăm, Khua Khul apăn bruă djuai ania gah Khua pơ ala mơnuih ƀôn sang dêh čar ta rơkâo ƀing khua pơ ala đing nao bơkơtuai, pơsit hơdôm bôh tơhnal dưi ngă, pơblang bôh than ba truh bruă akă dưi ngă. Mơng anun ba tơbiă jơlan pơsir kiăng ngă tui klă hloh dong hơdôm bruă hmâo ba tơbiă. Amăng anun, biă ñu đing nao truh hơdôm jơlan hơdră pơkă mơng dêh čar pơđĭ kyar bơwih ƀong mơnuih mơnam kual neh wa djuai ania ƀiă – kual čư̆ siăng./.

Siu H’ Prăk: Pơblang