VOV4.Jarai - Mơguah lơ 11/7, ƀơi ƀôn prong Đà Nẵng, Anom bruă Ping gah pơphun mông ngă lơphet jao pri tơhan sông kơtang brơi kơ Khul djru bruă prăk kak, sĭ mơdrô tơhan grup Ping gah kual 5. Amăng mông ngă lơphet, Khua Khul apăn bruă Ping gah dêh čar ơi Võ Văn Thưởng pơ ala brơi Ping gah, Kơnuk kơna jao tơlơi pơtrun mơng Khua mir sir kiăng kơ jao pri tơhan sông kơtang kơ Khul djru bruă tơhan Ping gah kual 5 yua kơ hơdôm tơlơi gum pơgôp yôm phăn amăng rơnuk blah ayăt Mi pơklaih rơngiao lŏn ia.

Khul apăn bruă Ping gah dêh čar jai pri tơhan sông kơtang kơ Khul djru bruă prăk kak, sĭ mơdrô amăng grup Ping gah kual 5

Đĭ pơhiăp amăng mông ngă lơphet, Khua Khul apăn bruă Ping gah dêh čar Võ Văn Thưởng pơsit tong, kual 5 lĕ kual lŏn akŏ phun amăng rơnuk blah ayăt Mi pơklaih rơngai lŏn ia. Ƀing apăn bruă, mơnuih mă bruă amăng Khul djru tơhan Ping gah kual 5 lêng kơ sông kơtang, gir run găn rơgao tơnap tap, tuh rơyuh pran jua, pơhlôm djru tui tlônling tơhan amăng bruă blah ayăt Mi pơklaih rơngao ƀơi tơdron blah wang kual 5, djru brơi tơhan blah wang ƀơi Hồ Chí Minh pơklaih rơngai kual Dơnung.

Siu Đoan: Pơblang