Mơ̆ng akŏ thun truh ră anai, Khul đah kơmơi mut phung tơring čar Phú Yê ngă hrŏm djop gưl amăng khul, kơtưn amăng bruă hyu pơtô pơblang, pôr brơi tơlơi pơhing, pơphun lu bruă mă kiăng ngă tui djơ̆ kơčăo bruă mrô 8-jing hơdră ngă bơkơnar rơkơi bơnai hăng pơsir hơdôm tơlơi ječ ameč pơdjơ̆ nao kơ ƀing đah kơmơi laih anun ƀing čơđai muai kual plơi pla djuai ƀiă. Khul đah kơmơi mut phung tơring čar Phú Yên hơmâo pơphun hăng lăi pơthâo 63 grup hyu pơtô lăi amăng plơi pla. Rim kơ grup hơmâo 10 čô ngă ding kơna kah hăng Khua git gai ping gah plơi, Khua plơi, khua khul đah kơmơi plơi, khua wai lăng djop djuai ania mơnuih mơnam hăng khul grup mơnuih tơpuôl amăng să.

Rim blan, grup hyu pơtô boh ƀiă 1 wơ̆t, kiăng lăi pơthâo jơlan hơdră kơnuk kơna, brơi ngă tui rơđah rơđong, ruah mă hơdră pơtô lăi kiăng ăl hăng rim sang anŏ mơnuih ƀôn sang amăng plơi pla. Grup hyu pơtô ba, pôr tơlơi pơhing amăng plơi pla, nao tơl rim sang, jŭ yap kiăng thâo tong ten tơlơi kiăng mơ̆ng mơnuih ƀôn sang. Giong anun, pơtlep hrŏm lu hơdră pioh pơtô lăi hăng pơsir hĭ hơdôm tơlơi dŏ gun tơnap tap mơ̆ng mơnuih ƀôn sang amăng plơi pla. Rơngiao kơ anun bruă jak iâu, pơtô ba kơ mơnuih ƀôn sang ngă hmua pla pơjing, pơđĭ kyar tơlơi bơwih ƀong huă, grup anai dŏ đing nao kơ ƀing čơđai muai amăng hơdôm sang anŏ juăt taih amang hăng sang anŏ brơi ană bă dŏ rơkơi mơ̆ng muai bơnai mơ̆ng anet aka ƀu djop thun pơkă; bruă lŏm lui hĭ tơlơi phiăn pơluk mơgu hơđăp kah hăng duăm ruă lĕ ngă yang djă hla tơpa gai, pơčrang boh mơnŭ, iâu yang tă tăn ƀu ba nao pơ sang ia jrao ôh. Adơi Hồ Ngọc Kim Linh dŏ ƀơi să Sơn Hội, tơring glông Sơn Hòa, tơring čar Phú Yên brơi thâo:

“Kâo kiăng biă jut hrŏm Grup hyu pơtô kơ ană plơi pla djơh hăng anai kiăng thâo hluh lu hloh laih anun  bĕ hĭ tơlơi soh tơlơi glăi. Amra djru kơ ta thâo lu boh tŭ yua amăng tơlơi hơdip mơda laih anun amra pơtrut pran jua ta pô gir run hloh kiăng thâo lu, thâo hluh dơlăm hơdôm tơlơi arăng pơtô hơgĕt djơ̆ mă tŭ anŏ hơgĕt soh glăi ta ƀuh mơ̆ng anai pơ klôn lui hĭ ñu”.

Tui hăng yă Hà Thị Thìn,Khua khul đah kơmơi mut phung Ea Trol, tơring glông Sông Hing, amăng tơlơi gir run kiăng pơgăn tơlơi juăt hơmâo arăng pơdŏ rơkơi mơ̆ng muai, dŏ bơnai mơ̆ng  anet, pơgăn tơlơi ngă sat taih amang čơđai muai, Khul đah kơmơi mut phung ƀơi să hrŏm hăng djop khul grup mơnuih mơnam pơkŏn nao tơl plơi pla, pioh mông pơtô lăi, pôr pơthâo rim blan, rim čăl klâo blan sa wơ̆t:

“Laih hơmâo tŭ mă hră pơtrun mơ̆ng Gơnong dlông ăt kah hăng mơ̆ng tơring čar, tơring glông lĕ Khul đah kơmơi mut phung dăp hơdră či mă bruă. Tơdơi kơ anun pok pơhai ngă tui akŏ bruă anun pok pơhai truh pơ djop plơi pla, kơčăo bruă mrô 8 laih anun pôr pơthâo, pơtô lăi tong ten laih anun akŏ pơjing khulgrup ngă tui bơkơnar rơkơi bơnai, ƀu kah akŏ ôh bơlăng ba laih anun akŏ pơjing grup lăi ƀu ngă tui ôh tơlơi pơdŏ ung mơ̆ng muai, dŏ bơnai mơ̆ng anet hăng ngă tui 5 mơta ƀu hơmâo lơ̆m ngă tui 3 mơta bruă rơgoh. Rim čăl 3 blan sa wơ̆t, gơmơi iâu pơtum jơnum khul đah kơmơi pơtô lăi kơ tơlơi phiăn pơkă bơkơnar rơkơi bơnai".

Yă Nguyễn Thị Phương Liên, Kơ-iăng Khua khul đah kơmơi mut phung tơring čar Phú Yên brơi thâo, thun blan rơgao, Khul đah kơmơi mut phung tơring čar Phú Yên hơmâo ngă hrŏm Gơnong bruă wai lăng Bruă mă Tơhan rơka hăng Mơnuih mơnam tơring čar pơphun anih pơtô brơi, pơđĭ tui tơlơi thâo hluh, tơlơi thâo amăng bruă mă kơ ƀing đah kơmơi ngă khua khul amăng tơring glông, să glăi hrăm kơ hơdră bơwih ƀong huă pơsir hơdôm bruă hơmâo pơdjơ̆ nao tơlơi rung răng arăng taih amang ană bơnai, ană bă amăng sang anŏ amăng plơi pla djuai ƀiă hăng kual čư̆ siăng.

Khul đah kơmơi mut phung tơring čar Phú Yên ăt git gai jơnum djop gưl khul đah kơmơi ƀơi plơi pla pok pơhư prong hơbô̆ bruă, hơdră ngă tŭ yua ăt kah hăng lu hơdră djơ̆ găl pok pơhai bruă mă, jak iâu brơi Grup hyu pơtô mơnuih ƀôn sang lăi pơthâo tui kơčăo bruă 8.

Khul đah kơmơi mut phung tơring čar Phú Yên ăt git gai djop gưl khul đah kơmơi mut phung pơyŭ pok prong hơdră ngă tui, tơlơi mă bruă ba glăi boh tŭ yua, pơđĭ tui bruă mă wai lăng djru bruă pơtô pơblang, pôr pơthâo kơ ană plơi pla yua ƀing khul đah kơmơi mut phung pô gơgrong kơčăo bruă 8.

“Hăng tơhnal pơkă lĕ truh thun 2025 amra akŏ pơjing 63 grup ră anai lĕ hơmâo 45 grup laih hăng 340 ding kơna ngă hrŏm. Djop khul grup anai hơmâo khul đah kơmơi pơtô brơi tơlơi thâo mă bruă hăng hơdră pơtô pơblang brơi kơ abih bang ƀing ding kơna amăng grup thâo”.

Bruă pok pơhai ngă tui kơčăo bruă 8 lĕ anŏ gêh găl pioh kơ Khul đah kơmơi mut phung djop gưl  hăng lu anom bruă kơnuk kơna ƀơi tơring glông pơtrut bruă mă djru ba ƀing đah kơmơi hăng čơđai muai mơnuih  djuai ƀiă, jing ƀing tŭ lu tơlơi kơƀah; tơnap tap; pơtrut ngă tui tơlơi dưi, jao kơ gơñu anŏ gêh găl hrưn đĭ pơtong rơđah tơlơi gơgrong phun ƀing đah kơmơi, čơđai muai amăng bruă akŏ pơdong hăng pơđĭ kyar plơi pla, djru hrŏ man pơdong tơring čar Phú Yên pơđĭ kyar hơđong kjăp.