Mơmot tom brơi lơ 21/5, ƀơi sang čua Quán Sứ, Hà Nội, Khul đăo Phơ̆t Việt Nam ngă yang pơpŭ kơ tơlang tơleh čơđeh asar arăng iâu ngă yang xá lợi, pơpŭ kơ tơlơi rơgơi pran jua hiam mơ̆ng Ơi Phơ̆t, laih anun rơdêh bơnga pơpŭ kơ hrơi tơkeng Ơi Phơ̆t blung a, thun phật lịch 2568 - thun ta 2024, kiăng kơ lŏn ia rơnuk rơnua yâo mơ-ak.

Ngă yang pơpŭ kơ tơlang tơleh čơđeh asar Ơi Phơ̆t blung a hăng rơdêh pơhrup guang bơnga čơkă hrơi tơkeng Ơi Phơ̆t pơphun mơ̆ng 7 mông mơmot truh kơ 9 mông mơmot, hơmâo hơdôm rơbâo čô khua, mơnuih tui đăo, ơi phơ̆t yă yơng hăng mơnuih ƀôn sang nao hrŏm. Rơdêh pơhrup bơnga hrŏm hăng rup Ơi Phơ̆t tơbiă mơ̆ng Khul đăo phơ̆t Việt Nam jơlan 73 Quán Sứ, găn nao glông jơlan Lý Thường Kiệt, Bà Triệu, Trần Hưng Đạo laih anun pơwơ̆t glăi pơ 73 Quán Sứ, Hà Nội. Hăng rim čô mơnuih tui đăo, hrơi Phật đản jing tơlơi hok mơ-ak, hơmâo pơƀuh glăi, mut hrŏm pran jua kah hăng hơmâo Ơi phơ̆t dŏ hrŏm, pơtô ba tơlơi klă hiam, tơlơi rơgơi, pơdjuai boh hiam amra čơkă boh hiam.