Thun blan rơgao, Khul djuai ania mơ̆ng sang bruă pơ ala mơnuih ƀôn sang dêh čar hăng 3 boh sang bruă kĭ hră ngă hrŏm, kiăo tui tơlơi dưi jao ngă bruă, rĭm sang bruă hăng boh yom phun pơkôl pơkă ngă hrŏm kiăng pơdjru nao rai tui tơlơi djơ̆ găl, prăp lui hlâo tơlơi pơhing, čih pơkra tơlơi phiăn, krăp lăng, hyu sem hăng rơkâo đĭ jơlan hơdră kơnuk kơna pok pơhai ngă tui.

Bruă ngă hrŏm anai hơmâo ba glăi boh tŭ yua sit nik, djru ba tơlơi hơdip mơda, tơlơi mơak pran jua kơ mơnuih ƀôn sang djuai ƀiă. Đĭ pơhiăp ƀơi mông jơnum, Khua pơ ala mơnuih ƀôn sang dêh čar ơi Trần Thanh Mẫn lăi lĕ, jơlan hơdră ngă hrŏm anai kiăng lir hơbit hăng bruă mă čih pơkra tơlơi phiăn, krăp lăng bruă git gai wai lăng amăng kơnuk kơna; pơhrua nao lu kơnôl tong ten kiăng čih pơkra hră pơtrun, jơlan hơdră, pơsir tơlơi tơnap tap amăng kual mơnuih ƀôn sang djuai ƀiă dŏ, kual čư̆ siăng, kual giăm guai; pơsir hĭ anŏ kơƀah, tơlơi dŏ gun mơ̆ng hlâo adih; ngă tui tŭ yua hloh amăng bruă lăi pơthâo tơlơi pơhing kơnôl tong ten amăng bruă mă hăng krăp lăng ngă tui djơ̆ tơlơi kiăng, bruă jao amăng rơnuk phrâo.