VOV4.Jarai-Mơguah lơ 31/5, Grup hyu mă bruă mrô 4 mơ̆ng Khul git gai gơnong dlông pơhlôm, pơgăn hưp ham ƀong kông ngăn, hơmâo mă bruă hăng khua mua ping gah tơring čar Dak Lak, pôr pơthâo hră pơtrun git gai hyu ĕp, sem lăng bruă ngă tui tơlơi phiăn, hơmâo ƀuh hăng tŭ mă hră tơgŭ kơđi, pơsir tơlơi pơthâo kơ mơnuih ngă soh, bruă soh glăi, brơi tơgŭ kơđi ƀing soh sat ƀong kông ngăn.

Tui hăng akŏ bruă, Grup amra mă bruă hăng khua mua phun git gai ping gah tơring čar laih anun nao ĕp lăng bruă mă ƀơi 4 boh sang bruă anun lĕ ping gah plơi prong Ƀuôn Ma Thuôt, Sang bruă pel ĕp kơđi mơnuih ƀôn sang tơring čar, anom bruă kông an tơring čar, anom bruă pel ĕp kơđi bruă mă tơring čar kơ boh yôm phun:

Bruă mă git gai, pơčrâo bruă djop sang bruă ping gah, anom bruă pơphun bruă ping gah dơ̆ng mơ̆ng bruă pơjao glăi bruă, tŭ mă bruă hăng pơsir hơdôm tơlơi pơhing pơthâo brơi bruă soh sat, mơnuih ngă bruă soh glăi, pơtum ĕp lăng  bruă amuñ hưp ham ƀong kông ngăn; soh sat, bruă ngă tơnap kơ mơnuih ƀôn sang; bruă mă pơsir tơlơi pơhing mơnuih ƀôn sang mơ-it nao pơthâo brơi bruă soh sat hăng tơlơi pơhing soh sat; bruă ngă kơplah wah anom bruă kơnuk kơna pô ƀuh tơlơi soh glăi, jao tŭ mă pơsir tơlơi pơhing lăi pơthâo mơnuih soh; pơsir hră rơkâo pơsir jăm ƀuah, lăi pơthâo bruă mă aka ƀu djơ̆ hăng tơlơi phiăn lơ̆m ƀuh, lăi pơthâo, tŭ mă, jao pơsir hơdôm tơlơi pơhing lăi pơthâo bruă mă soh glăi.

Nay Jek: Pơblang