VOV4.Jarai - Mơguah lơ 2/3, ƀơi să guai lŏn ia Krông Na, tơring glông Buôn Đôn, Khul hlăk ai tơring čar Daklak hăng Khul hlăk ai tơring čar Lâm Đồng gum hrom pơphun jơlan hơdră Blan 3 guai lŏn ia thun 2022 hăng anăn ñu “Guai lŏn ia kâo”. Yua bơbeč mơng klin ruă, jơlan hơdră dưi pơphun rơguăt hăng lu bruă mă tŭ yua. Jơlan hơdră blan 3 guai lŏn ia mơng hlăk ai 2 tơring čar Daklak hăng Lâm Đồng dưi pơphun hăng lu bôh yôm sit nik, tŭ yua kah hăng: ngă tui ring bruă ngă bơngač jơlan guai lŏn ia ƀơi kual Gru grua đưm lŏn ia Tơdrun găn ia krông Serepok, giăm anih Puih kơđông pơgang guai lŏn ia Serepok pơdŏng puih kơđông. Pơdŏng ring bruă pruih ia mă ha jăn kơ đang phun pla hlăk ai ƀơi Puih kơđông pơgang guai lŏn ia Serepok. Gơnam brơi ƀing ling tơhan pơgang guai lŏn ia glăk mă bruă ƀơi kual guai lŏn ia Krông Na hăng ƀơk 150 pok khăn gru Lŏn ia kơ mơnuih ƀôn sang Drang Phôk, să Krông Na, tơring glông Buôn Đôn. Abih bang prăk mă yua kơ hơdôm bruă mă lĕ rơbêh kơ 100 klăk prăk./.

Siu H’ Prăk: Pơblang