Jơlan hơdră hơmâo pok pơhai tơl djop khul hlăk ai, pơtum pơƀut ƀơi hơdôm anih pơplông hăng tơlơi mut hrŏm mơng hơdôm rơbâo čô hlăk ai. Amăng anun, khul hlăk ai amăng hơdôm boh sang hră gưl prong, cao đẳng akŏ pơjing 12 grup djru brơi hăng rơbêh 300 čô ding kơna, khul hlăk ai sang hră gưl III hăng hơdôm khul hlăk ai să, phương, kual bul pơtâo pơhlôm brơi 273 anih djru brơi ƀing čơđai.

Hlâo kơ tal pơplông, hơdôm grup anai hơmâo pơtrut tañ bruă pơblang brơi “Bơyan pơplông yâo mơ-ak”, pơtrut pơsur pơgôp ngăn rơnoh kiăng djru brơi prăk hrăm hră “Pơtrut pran nao pơplông”, djru pơtô hrăm, črâo brơi hrăm bruă hăng pơsur pran jua čơđai gir kơtir. Jơlan hơdră pơgôp ngă gêh gal, djru brơi ƀing čơđai hơđong pran jua yak nao tal pơplông yôm phăn anai.