VOV4.Jarai - Tom brơi lơ 4/3, Khul mơnuih mă bruă mut phung khul djuai ania amăng Ƀirô Khua pơ ala mơnuih ƀon sang dêh čar yua ơi Y Thanh Hà Niê Kđăm - Ding kơna Khul apăn bruă Ping gah - Ding kơna Jơnum min apăn bruă Khua pơ ala mơnuih ƀon sang dêh čar , Khua Khul djuai ania ba jơlan hlâo hơmâo mông mă brua whăng Jơnum min mơnuih ƀon sang tơring čar Sóc Trăng kiăng kơ pel ĕp, lăng glăi tơlơi ba glăi lơ̆m ngă tui tơlơi pơtrun mơng Khua dêh čar hăng tơlơi pơtrun mơng Jơnum min djuai ania kơ hơdôm hơdră bruă bơdjơ̆ nao mơnuih djuai ania ƀiă ƀơi Sóc Trăng. Tui hră lăi pơthâo mơng Jơnum min mơnuih ƀon sang tơring čar Sóc Trăng, bruă ngă tui 2 tơlơi pơtrun  anai glăk amăng hơdôm hrơi blung a yua anun Jơnum min mơnuih ƀon sang tơring čar hơmâo ngă gêh gal djop mơta brơi djop ƀon lan amăng bruă pơsit kiăng kơ pok pơhai ngă tui hơdôm hơdră djru mơnuih djuai ania ƀiă rơwang pơ anăp anai. Đĭ pơhiăp amăng mông mă bruă, Khua khul djuai ania Y Thanh Hà Niê Kđăm brơi thâo mơng tơlơi rơkâo mơng tơring čar Sóc Trăng, grup hyu mă bruă amra tŭ mă, pơgôp hiăp hăng djop ding jum, gơnong bruă bơdjơ̆ nao mơng anun rơkâo đĭ kơnuk kơna kiăng kơ djru brơi ƀon lan ngă klă tui hơdôm hơdră bruă anai brơi djơ̆ hăng tŭ yua hloh.

Siu Đoan: Pơblang