VOV4.Jarai - Mơguah lơ 7/3, ƀơi ƀôn prong Đà Nẵng, pơphun Jơnum lăi glăi bruă mă amăng Khul pơ ala mơnuih ƀon sang hơdôm tơring čar, ƀôn prong kual Tong krah, Dap kơdư thun 2021 hăng pok pơhai bruă mă amăng thun 2022. Thun 2021, djop ƀon lan hơmâo gir run găn rơgao tơnap tap, pơphun truh kih hrơi plĕ hră ruah Khua mua pơ ala mơnuih ƀon sang dêh čar tal XV hăng Khul pơ ala mơnuih ƀon sang djop gưl rơwang thun 2021-2026. Kơ-iăng Khua git gai pơ ala mơnuih ƀon sang dêh čar ơi Trần Thanh Mẫn brơi thâo, Khul pơ ala mơnuih ƀon sang djop tơring čar, ƀôn prong hơmâo ngă klă hơdôm bruă krăo lăng, pơplih phrâo, klă dong amăng bruă tơña hăng lăi glăi, pơphun lu tal pel ĕp bruă mă. Samơ̆, ơi Trần Thanh Mẫn dŏ bơngŏt kơ bruă blơi gơnam, lu ƀon lan hơmâo ngă klă, samơ̆, sa, dua anih aka ƀu klă ôh ƀudah ngă ƀu djơ̆ hăng tơlơi pơkă mơng anun ba truh tơlơi ngă soh. Khul pơ ala mơnuih ƀon sang lĕ anom bruă krăo lăng samơ̆ aka pel ĕp ƀuh hơdôm bruă ngă soh anai. Kơ bruă pơ anăp anai hăng hơdôm hơdră bruă amăng thun 2022, Kơ-iăng khua git gai pơ ala mơnuih ƀon sang dêh čar ơi Trần Thanh Mẫn rơkâo Khul pơ ala mơnuih ƀon sang djop tơring čar, ƀôn prong tŏ tui pel ĕp, pơgiong hăng pơphun ngă tui hơdôm akŏ bruă, tŏ tui pơplih phrâo, pơphun truh kih jơnum pơƀut, klă dong amăng bruă bưp mơnuih ƀon sang, bruă tơña hăng lăi glăi tơña.

Siu Đoan: Pơblang