VOV4.Jarai - Lơ 14/7, tal jơnum Khul pơ ala mơnuih ƀôn sang tơring čar Daklak tal 10 đing nao bơkơtuai lu bôh yôm phăn bơdjơ̆ nao hơdôm jơlan gah ngă tui hơdôm tơhnal pơkă, bruă pơđĭ kyar bơwih ƀong – mơnuih mơnam, pơhlôm pơgang lŏn ia – rơnuk rơnua plơi pla 6 blan rơnuč thun, hơdôm tơlơi bơdjơ̆ nao sit nik truh tơlơi hơdip mơnuih ƀôn sang.

Khua pơ ala Trần Hồng Tiến pơhiăp amăng tal jơnum lok 4 Khul pơ ala mơnuih ƀôn sang tơring čar Daklak

Mơng bruă bơkơtuai, ƀing khua pơ ala tŭ ư hrom hăng tơlơi lăi pơthâo glăi bôh tơhnal ngă tui bruă mă 6 blan akô̆ thun, hrom hăng anun rơkâo hơdôm ƀirô khom pơtrut kơtang bruă pơplih bruă ngă hră pơ-ar hăng ngă pơhư̆č tuh pơplai; đing nao tuh pơplai, pơđĭ kyar hơdră pơkă jơlan nao rai, phrâo rơnuk anai... Gah bruă đang hmua, ƀing khua pơ ala rơkâo Jơnum min mơnuih ƀôn sang tơring čar hăng hơdôm gơnong bruă hmâo bruă sĭ sầu riêng kơ dêh čar tač rơngiao. Hăng lŏn pla năng ai ñu 12.000 ektar đang sầu riêng, mrô bôh ñu rim thun rơbêh kơ 125.000 tơn, Daklak khom pơtrut kơtang bruă sĭ gơnam  kơ dêh čar tač rơngiao./.

Siu H’ Prăk: Pơblang