VOV4.Jarai - Mơguah lơ 18/5, khul sem lăng bruă mơng Jơnum min Tơlơi phiăn mơng Ƀirô git gai pơ ala mơnuih ƀon sang dêh čar tal 15 yua ơi Nguyễn Trường Giang, Kơ-iăng khua Jơnum min Tơlơi phiăn ngă khua khul, hơmâo mông ngă bruă hăng tơring čar Dak Lăk kơ bruă ngă tui tơlơi phiăn tơlơi dưi, tơlơi pơkă ruah khua mua wai lăng hăng bruă wai lăng mơnuih mă bruă kiăo tui bruă hơmâo jao. Yap truh lơ 31/12/2021, mrô mơnuih mă bruă kơnuk kơna amăng tơring čar lĕ rơbêh 37.000 čô mơnuih, amăng anun mơnuih djuai ƀiă hơmâo 12,5%.

Ƀơi mông mă bruă, khua mua tơring čar Dak Lăk lăi pơthâo hơdôm tơlơi tơnap laih anun rơkâo: bruă ruah khua wai lăng, biă ñu amăng anom bruă pơtô pơjuăt, ia jrao dŏ bưp tơnap tap, yua hơmâo tơlơi bơrơkua amăng tơlơi pơkă pơtô pơhrua tui tơlơi rơgơi git gai, wai lăng tui bruă hơmâo jao. Lăng yôm bruă ngă tui tơlơi phiăn kơ tơlơi pơkôl pơkă ruah khua, bruă wai lăng mơnuih mă bruă amăng tơring čar, Kơ-iăng khua Jơnum min Tơlơi phiăn ơi Nguyễn Trường Giang ăt brơi thâo mơn, khul amra pơƀut glăi tơlơi pơgôp hiăp, rơkâo đĭ mơng tơring čar, lăi pơthâo hăng Jơnum min Tơlơi phiăn mơng Ƀirô khua git gai pơ ala mơnuih ƀon sang sem lăng, hơmâo tơlơi pơsir brơi lăp djơ̆.

Siu H’Mai: Pơblang