Rơbêh 2 blan tơdơi kơ bruă rơdêh container jrom nao hơdôm boh sang ƀơi sang čơ 312, să Dak R’la, tơring glông Dak Mil, tơring čar Dak Nông, sang anŏ ơi Hoàng Văn Tuấn khŏm nao pơdong sang dŏ pơ hmua yơh. Tơlơi hning rơngô̆t yua rơngiă 2 čô ană lơm rơdêh jrom djơ̆ ăt aka abih lơi. Ñu brơi thâo:

“Rơngiă ha wŏt dua čô ană ngă sang anŏ rơngô̆t biă mă. Ră anai rai pơdong sang pơ anai ăt dŏ jang jai mơn, pơ dô̆ hơđăp ƀing gơmơi ƀu khin dŏ ôh. Anun arăng črâo brơi pơdong sang gah tlôn anai, samơ̆ gah tlôn ăt amăng lŏn anun mơn. Rai dŏ pơ anai lăng pơpă lêng kơ ƀuh ană bă sôh”.

Bruă pơjrom rơdêh ƀu djơ̆ ngă djai mơnuih, ngă ƀing mơnuih amăng sang anŏ hning rơngô̆t đôč ôh mơ̆ ăt pioh glăi tơlơi sat, đa bơdjơ̆ nao tơlơi phiăn. Ayong Nguyễn Văn Chí, dŏ ƀơi să Dak Buk So, tơring glông Tuy Đức, tơring čar Dak Nông ăt hning mơn: lơm tơdơi kơ 3 thun mă krư̆, samơ̆ bruă pơjrom rơdêh ăt dŏ kơđŏm glăi amăng akŏ dlô. Mơmŏt lơ 15/3/2021, ñu mơgăt rơdêh glăk trun kriang, yua đuăi kơtang đơi hăng ƀu lăng hyu jrom djơ̆ 2 čô čơđai đĭ rơdêh thut pơđuăi hăng apui lơtrik. Ayong Chí brơi thâo:

“Kâo phrâo tơbiă sang mơnă pot glăi pơ plơi pla. Lơm glăk dŏ sang mơnă amăng akŏ dlô ăt dŏ na nao kơ bruă jrom djơ̆ čơđai djai. Tơdah lơm anun đuăi rơnang ƀiă, năng ai ñu huăi pơjrom ôh. Tơdơi kơ tơbiă mơng sang mơnă kâo ƀu khin mơgăt rơdêh dong tah, him lăng amra kiăo tui arăng hyu man pơdong sang ƀudah ngă kông ñơn pơ Bình Dương, Sài Gòn adih”.

Tui anom bruă wai lăng jơlan glông tơring čar Dak Nông, 3 thun giăm anai, bruă rơdêh pơjrom amăng tơring čar hrŏ trun yơh. Samơ̆, mrô rơdêh pơjrom ngă djai mơnuih ăt ƀuh lu tui. Boh truh tơlơi anai lĕ yua ƀing mơgăt rơdêh  hăng gah bơnah dong lĕ yua jơlan glông aka ƀu pơhlôm brơi klă hloh. Ơi Nguyễn Nhân Bản-Khua gơnong bruă wai lăng jơlan glông, Kơ-iăng khua anom bruă wai lăng jơlan glông tơring čar Dak Nông brơi thâo, sa, dua hơdră phun kiăng plai ƀiă ƀuh rơdêh pơjrom:

“Anom bruă wai lăng jơlan glông tơring čar hơmâo git gai anom bruă bơdjơ̆ nao anun lĕ ding kơna pok pơhai hơdôm hơdră bruă pơtô pơblang, lăi pơthâo tơlơi phiăn kơ pơhlôm rơnuk rơnua amăng jơlan glông kiăng mơnuih ƀôn sang răng kơđiăng lơm đuăi rơdêh amăng jơlan; kơtưn pel ĕp, pơsir hĭ hơdôm bruă ngă soh. Pơphun hyu pel ĕp, pơkra ming jơlan glông, sit biă ñu hơdôm anih juăt ƀuh rơdêh pơjrom. Hrưn đĭ klă ƀiă dong amăng bruă pơtô mơgăt rơdêh, jao hră mơgăt rơdêh, hră pơ-ar rơdêh, kơtưn gum hrŏm ngă klă bruă pơhlôm rơnuk rơnua amăng jơlan glông”.

Bruă rơdêh pơjrom lĕ bruă ngă bơngŏt amăng mơnuih mơnam, yua tơlơi anai amra pioh glăi tơlơi sat. Kiăng kơ plai ƀiă ƀuh rơdêh pơjrom, hrŏm hăng hơdôm hơdră bruă mơng anom bruă bơdjơ̆ nao, rĭm čô mơnuih kiăng ngă tui tơlơi phiăn lơm đuăi rơdêh amăng jơlan glông. Mơng anun, dưi pơgang kơ ta pô kah hăng huăi ƀuh hơdôm tơlơi hning rơngô̆t yua pơjrom rơdêh./.