Giăm 60 thun tơdơi kơ hrơi djai pơsăn drơi, tơhan Ka Tơ Tiên, thun tơkeng 1949, Kơ-iăng khua grup tơhan tơring glông Anh Dũng, glăk dŏ đih glăi amăng kual glai čư̆, ră anai dong amăng să Anh Dũng, tơring čar Khánh Hòa. Yua sui thun anun ngă lŏm tui ƀơƀrư̆ kru đưm hlâo adih, ƀing mơnuih thâo anih dor đưm hlâo adih ăt ƀiă tui mơn. Samơ̆ hăng ling tơhan hyu ĕp, rĭm tơlơi pơhing, mah anet, lêng jing tơlơi yôm, kiăng pơsit brơi, yua gah tlôn anun lĕ sa čô tơhan glăk dŏ tơguăn pot glăi pơ plơi pla.

Mơng hră pơ-ar, tơlơi bơră ruai glăi mơng ƀing mơnuih dŏ hơdip laih dong tơlơi hơdor glăi mơng pô sang, ling tơhan hơmâo gir run pơlăng nao rai, ĕp lăng rĭm kual. Ơi Ka Tơ Toàn, adơi tơhan djai pơsăn drơi, mơnuih ba jơlan, djru črâo brơi anih dor. Tơdơi kơ hơdôm hrơi hyu ĕp, hrĭp phă ƀom mĭn, kơnôl 5/8 rơgao, tơhan tơhan Ka Tơ Tiên hơmâo ĕp ƀuh. Giăm 60 thun dŏ tơguăn, tơhan đưm hlâo dưi glăi hrŏm ƀing gŏp, glăi pơ sang anŏ hăng plơi pla. Ơi Ka Tơ Toàn ol kơdol brơi thâo: “Lơm dưi ba ayong kâo glăi dor ƀơi pơsat dor tơhan djai pơsăn drơi lĕ klă biă mă yơh, mơ̆ brơi đih glăi amăng glai, amăng čư̆ tui anun pap mơn. Hlâo adih, ƀu hơmâo hlơi tŭ ñang brơi kơ ñu. Tŭi ñang kơnong ha wŏt đôč, yua pơ sang ăt ƀu thâo ñu đih glăi pơ hơpă ôh”.

Tơlơi bơră ruai lăi nao tơhan djai pơsăn drơi Ka Tơ Tiên ăt brơi ƀuh sa tơlơi sit nik: ƀơi hơdôm kual plơi pla čư̆ siăng Khánh Hòa, tơlơi hơdor pioh kơ ƀing djai pơsăn drơi ăt dŏ mơn, samơ̆ yua sui thun, anun ƀing mơnuih dŏ hơdor ăt aset tui, lơm anun hră čih pioh ƀu djơ̆ hlơi lêng kơ djop tong ten soh ôh. Ƀơi să Anh Dũng, să prong, mơnuih dŏ raih daih, lu kual ataih, asuek amăng glai čư̆. Hăng mơnuih djuai ania Raglai, tơdơi kơ hrơi pơthi, bruă nao čuă, tŭi ñang ƀu dŏ dong tah. Ƀing mơnuih dor amăng rơnuk blah wang, tơdah ƀu hơmâo tơlơi čih pioh, găn rơgao sui thun ăt tơnap mơn ĕp glăi.

Yua anun, amăng hơdră bruă 500 hrơi mlăm, gưl Ping gah, gong gai ƀon lan hăng ling tơhan hơmâo nao tơl rĭm boh plơi pla, rĭm boh sang anŏ; bưp ƀing tha rơma, mơnuih arăng đăo gơnang hăng ƀing mơnuih dŏ hluh glăi kơ hơdôm tal blah wang đưm hlâo adih. Ơi Pa Xây Mơ, Khua git gai Ping gah plơi Ú, să Anh Dũng brơi thâo, rĭm tơlơi pơhing hơmâo tŭ mă, pơlăng nao rai hăng hră pơ-ar laih dong pơsit tong kual lŏn mơnai dor tơhan. “Tơlơi phiăn mơng djuai ania Raglai ƀơi ana, tơdơi kơ hơmâo mơnuih rơngiă, 1 thun tơdơi amra ngă yang pơthi. Ƀu nao tŭi ñang rĭm hrơi ƀudah ngă yang hơget dong tah. Lơm pơphun hơdră bruă 500 hrơi mlăm, neh met wa tŭ ư biă mă, dong yua yua kơ rĭm thun, ană tơčô dưi nao čuă, tŭi ñang hơdor tơngia kơ ƀing anong met wa djai pơsăn drơi.”

Mơng pel ĕp, să Anh Dũng (tơring čar Khánh Hòa) blung a pơsit 39 čô tơhan hơmâo dor amăng kual lŏn anai. Amăng anun, 11 čô hơmâo klơi pơƀut. Mơng tơlơi pơhing ƀơi ƀon lan, tơhan hyu ĕp tŏ tui pok prong tơl hơdôm boh plơi pla, anai lĕ kual ngă hơkrŭ, anih pơphun kơsung blah.

Ƀơi čư̆ Hòa Chảo, să Vạn Ninh, bruă hyu ĕp glêh glar ƀiă lơm ling tơhan khŏm đĭ nao kual glông rơbêh 840 met pơhmu hăng jơlah ia rơsĭ. Jơlan đĭ kriang pơtâo dong, hŭi rơhyưt. Mơnong ƀong huă, ia mơñum hăng gơnam măi mok djru brơi bruă hyu ĕp khŏm glăm hăng bra đôč. Trung tá Nguyễn Hải Sơn, grup hyu ĕp, klơi rŭ đĭ tơlang tơhan tơring čar Khánh Hòa brơi thâo, tơdơi kơ hơdôm hrơi dŏ glăi amăng glai, ling tơhan hơmâo ĕp ƀuh hăng klơi rŭ đĭ 4 per tơlang tơleh tơhan djai pơsăn drơi. “Ƀing apăn bruă, ling tơhan gir run biă mă, đĭ kriang pơtâo, trun amăng čroh ia, găn rơgao kơčong čư̆, čur gah yŭ pơtâo hŭi rơhyưt. Mah bưp lu tơnap tap samơ̆ yua kơ hơmâo tơlơi juh alum pran jua mơng ƀing gŏp, grup dưi trun truh ƀơi tơkai čư̆. Ba 4 per tơlang tơhan djai pơsăn drơi hăng čư̆ Hòn Chảo, kual ngă hơkrŭ đưm hlâo amăng tơring čar Khánh hòa ba glăi pơ rơnuk rơnua.”

Ƀơi tơring čar Khánh Hòa, bruă mă lơm pok pơhai hơdră bruă 500 hrơi mlăm ăt dŏ lu biă mă. Rơbêh 400 kual hăng giăm 2.400 tơlơi pơhing bơdjơ̆ nao tơhan djai pơsăn drơi, pơsat tơhan glăk tŏ tui ĕp lăng. Akŏ phun lĕ hơdôm kual hlâo adih lĕ anih blah wang, anih ngă hơkrŭ, kual glai čư̆ hăng anih hơmâo tơlơi pơhing kơ pơsat dor hrŏm lu mơnuih. Hăng kual glai čư̆, bơyan hơjan glăk ngă glêh tơnap brơi kơ bruă hyu ĕp. Jơlan nao rai bor, amuñ lŏn tơhroh, bruă hyu ĕp bưp lu tơnap tap. Khánh Hòa glăk pơkiăo nao tơhan, kiăng hơdeč hmar hyu ĕp ƀơi hơdôm anih hơmâo tơlơi pơhing.

Hrŏm hăng bruă hyu ĕp, bruă ĕp brơi anăn krăn pô kơ tơhan djai pơsăn drơi aka ƀu tong ten ăt hơmâo pơtrut tañ. Đại tá Trương Thành Việt, Khua anom bruă git gai ling tơhan tơring čar Khánh Hòa brơi thâo, tơring čar hơmâo pơgiong bruă  klơi rŭ, pel ĕp hăng mă tơlang meh ƀơi rơbêh 2.100 akŏ pơsat aka ƀu thâo tong ten anăn ƀơi 7 boh pơsat, tañ ƀiă tui tơlơi pơkă. “Ngă tui hơdră bruă 500 hrơi mlă, anom bruă git gai ling tơhan tơring čar ngă bruă glăm ba hloh, kiăng ƀing ling tơhan dưi pơgiong bruă jao hlâo kơ bơyan hơjan hlim. Ƀing gơmơi mă bruă hăng gưl Ping gah, gong gai ƀon lan, jak iâu mơnuih ƀon sang, hlăk ai, đah kơmơi djru brơi kiăng tơhan klơi rŭ dưi pơgiong bruă jao tañ hloh.”

Giăm 60 thun rơgao, hơdôm glai čư̆, anih ling tơhan juăt blah ayăt đưm hlâo hăng djai pơsăn drơi hơmâo pơplih lu biă mă. Hơdôm tơlơi hơdor pioh, hră pơ-ar dŏ glăi hăng rĭm kru dŏ glăk glăi tô glăi. Hăng rĭm per tơlang tơleh hơmâo ĕp ƀuh, sa čô tơhan dưi pot glăi pơ plơi pla, hăng sa boh sang anŏ hơmâo dong anih pioh hơdor kơ pô sang tơdơi kơ hơdôm thun dŏ tơguăn./.