VOV4.Jarai - “Rơkâo djop anom bruă bơdjơ̆ nao kiăng kơtưn amăng bruă pel ĕp, kiăo tui lăng bruă sĭ mơdrô gơnam pioh pơgang klin Covid-19 anun lĕ jrao, kit pơčrang lăng, măi pơkă lăng oxy amăng drah … kiăng kơ pơgôp pơđut hĭ bruă đĭ nua sĭ mơdrô ča čot hăng pơhlôm brơi tơlơi suaih pral kơ mơnuih ƀon sang, pơhlôm brơi tơlơi dưi kơ ƀing mơnuih blơi gơnam. Anai lĕ sa amăng hơdôm tơlơi rơkâo mơng Khul apăn bruă phiah phiăn mơng Khua pơ ala mơnuih ƀon sang dêh čar amăng mông jơnum lăi pơthâo sa, dua bruă bơdjơ̆ nao bruă pơgang klin Covid-19 tui bruă glăm ba mơng Jơnum min phiah phiăn pơphun laih rơgao. Amăng rơwang hrơi tơjuh laih rơgao, lu tơring čar hơmâo mrô mơnuih ƀă klin Covid-19 phrâo lĕ ƀing čơđai ƀuh lu biă mă, sit biă ñu lơ̆m ƀing čơđai pơwŏt glăi nao sang hră. Samơ̆, bruă črâo ba amăng pơčrang lăng, pơčlah kiăo tui lăng tơlơi suaih pral hăng ƀing čơđai hơmâo tơlơi ruă amăng drơi jăn, bruă pơsir lơ̆m ƀuh čơđai ƀă klin Covid-19 amăng sang hră, hrơi mông pơčlah pơ sang hăng ƀing čơđai ră anai aka ƀu tong ten ôh.

Siu Đoan: Pơblang