Amăng hơdôm hrơi rơgao, tơlơi pơhing lăi nao lŏn pơpư̆ kơtang 5 độ richter ƀuh amăng yang hrơi dong lơ 28/7 ngă pơpư̆ lu anih hơmâo mơnuih ƀôn sang lăi pơthâo. Neh met wa lăi pơthâo anŏ gơñu mưn, laih dong pơdah tơlơi bơngŏt lơm ƀuh bruă tui anai. Amai Y Phiếu, mơnuih dŏ amăng plơi Rô Xia, să Đăk Tăng brơi thâo:

“Kâo đuăi tơbiă gah rơngiao blung a hăng tơdơi anun hyu ĕp ană bă. Mơnuih ƀôn sang ăt hŭi biă mă yua anai lĕ tal lŏn pơpư̆ kơtang hloh samơ̆ lơm hơmâo arăng juh alum pran jua, črâo ba tơdruă yua anun mơnuih ƀôn sang dưi dŏ dong hơđong amăng pran jua”.

Tơdơi kơ ƀuh lŏn pơpư̆, amăng hơdôm hrơi laih rơgao, gong gai, khul grup amăng hơdôm boh să amăng tơring glông Kon Plông, tơring čar Kon Tum hơmâo pơkiăo nao mơnuih apăn bruă nao tơl hơdôm boh plơi pla pel ĕp tơlơi sit nik, laih dong pơtă mơnuih ƀôn sang gơgrong amăng bruă pơhlôm hlâo tơdah ƀuh lŏn pơpư̆ dong. Ơi Nguyễn Văn Bay, Khua Jơnum min mơnuih ƀôn sang să Đăk Tăng brơi thâo, yua tơlơi lăi pơthâo hmao tlôn mơng mơnuih ƀôn sang ƀơi 11 boh plơi pla amăng să, anun huăi ngă hlơi ôh bral rơngal kơ tal lŏn pơpư̆ anai.

“Tơdơi kơ lŏn pơpư̆ kơtang amăng lơ 28/7, tui tơlơi git gai mơng Jơnum min mơnuih ƀôn sang tơring glông, să hơmâo akŏ pơjing hơdôm grup mă bruă, jao bruă brơi ƀing mơnuih thâo amăng bruă pơtô pơblang, pơtrut pơsur hăng nao lăng tong ten tơlơi sit nik ƀơi rĭm boh plơi pla amăng să. Laih dong pơ alum pran jua neh met wa, tŏ tui pơtô pơblang, pơtrut pơsur neh met wa hơđong bơwih ƀong huă”.

Gơgrong pơhlôm hlâo hăng lŏn pơpư̆, amăng hơdôm hrơi rơgao anom bruă wai lăng rŏng lŏn hơmâo gum hrŏm hăng gong gai tơring glông Kon Plông pơphun lu wŏt pơtô hrăm bơdjơ̆ nao tơlơi anai brơi neh met wa. Yua anun lu mơnuih amăng hơdôm boh să ƀuh lŏn pơpư̆: Đăk Tăng, Đăk Nên, Đăk Ring, Măng Bút, Ngọc Tem…lêng kơ thâo rơđah kơ bruă pơhlôm hlâo lơm lŏn pơpư̆. Amon Nguyễn Bỉnh Khiêm dŏ amăng plơi Vi Xây, să Đăk Tăng brơi thâo, hơdôm bruă kiăng ngă lơm lŏn pơpư̆ lĕ pơhlôm rơnuk rơnua brơi kơ ta pô hăng mơnuih jum dar:

“Pơ sang hră kâo ăt hơmâo ƀing nai pơtô brơi laih dong hơdôm tal pơtô pơblang kơ bruă pơhlôm hlâo lơm lŏn pơpư̆ amăng să, plơi pla dong. Lơm ƀuh lŏn pơpư̆ kâo amra čur gah yŭ kơƀang ƀudah gah yŭ sưng kiăng kơ bĕ hĭ hơdôm gơnam tam ƀudah bơbung sang glưh trun kiăng pơgang rơnuk rơnua brơi kơ ta pô”.

Bơ amon Y Vỹ (ăt dŏ amăng să Đăk tăng) brơi thâo, bruă yôm hloh ƀing ta kiăng ngă kah dưi djru brơi neh met wa pơhlôm hlâo lơm lŏn pơpư̆.

“Ăt hơmâo lu mơnuih thâo laih samơ̆ ƀing tha rơma ăt dŏ lu aka ƀu thâo lơi. Ƀing gơmơi amra črâo ba, lăi pơthâo brơi ƀing gơñu čur gah yŭ kơƀang ƀduah đuăi tơbiă gah rơngiao kiăng pơhlôm rơnuk rơnua brơi kơ ta pô”.

Mơng blan 4/2021 truh ră anai amăng tơring glông Kon Plông, tơring čar Kon Tum ƀuh giăm 800 wŏt lŏn pơpư̆ hăng tui tơlơi pơsit mơng anom bruă wai lăng rŏng lŏn lĕ yua bơdjơ̆ nao dơnao pơkŏng ia mơng drai ia apui lơtrik ngă. Amăng 2 hrơi rơgao, ƀơi anăp kơ bruă lŏn pơpư̆ ƀuh na nao, jai kơtang tui pơhmu hăng hlâo anun, ơi Lê Đức Tín, Kơ-iăng Jơnum min mơnuih ƀôn sang tơring glông Kon Plông brơi thâo, tui tơlơi črâo trun mơng tơring glông lĕ gơgrong kiăo tui lăng hăng anăm ngă bral rơngal amăng bruă pơhlôm hlâo lŏn pơpư̆:

“Ƀing gơmơi tŏ tui lăng hơdôm hră pơ-ar lăi pơthâo mơng anom bruă wai lăng rŏng lŏn, hơmâo djop tơhnal kiăng kơ črâo ba, lăi pơthâo brơi dong kơ mơnuih ƀôn sang gơgrong pơhlôm hlâo tơdah lŏn pơpư̆. Git gai hơdôm boh să pơphun pơtô pơblang, pơtrut pơsur, lăi pơthâo tơl hơdôm boh plơi pla, rĭm boh sang anŏ kiăng thâo tong ten hăng prap lui klă ƀiă dong. Pơphun pơtop hrăm brơi ƀing mơnuih amăng kual lŏn pơpư̆ tơdơi anun pok pơhai tơl djop plơi pla amăng tơring glông. Mơng anun, djru brơi khul git gai amăng hơdôm boh să thâo lơm ƀuh lŏn pơpư̆”.

Tui tơlơi pơhing mơng anom bruă pơhŭi hlâo lŏn pơpư̆ hăng ia rơsĭ blôk-anom bruă wai lăng rŏng lŏn brơi ƀuh, amăng 2 hrơi mơng lơ 28-29/7 ƀuh 46 wŏt lŏn pơpư̆ hăng anih phun lĕ tơring glông Kon Plông, tơring čar Kon Tum. Tui sit nik brơi ƀuh, rơngiao kơ tal lŏn pơpư̆ kơtang 5 độ richter ƀuh amăng yang hrơi dong lơ 28/7, ngă pơpư̆ ƀơi lu anih, hơdôm tal lŏn pơpư̆ tơdơi anun mơnuih ƀôn sang ăt ƀu mưn hơget ôh. Anŏ ba truh amăng tal lŏn pơpư̆ anai lĕ huă hơget ôh. Gong gai hăng mơnuih ƀôn sang amăng tơring glông Kon Plông, tơring čar Kon Tum glăk tŏ tui gơgrong pơhlôm hlâo hăng hơdôm anŏ amra ƀuh ƀu hmao thâo lơm lŏn pơpư̆./.