VOV4.Jarai - Anom bruă Kơnuk kơna phrâo hmâo Tơlơi lăi pơthâo mrô 57 kơ klah čun mơng Khua dêh čar ơi Phạm Minh Chính amăng mông jơnum tui tơđar Kơnuk kơna kơ Akô̆ buă “Dăp glăi anom bơwih ƀong kơnuk kơna, phun ñu lĕ grŭp bơwih ƀong, phun akha sang bruă kơnuk kơna rơwang mơng thun 2021-2025”. Amăng mông klah čun anai, Khua dêh čar ơi Phạm Minh Chính lăi rơđah tơlơi pơtă đing nao ngă giong hơdră pơkă, hơdră bruă gum djru, pơhlôm bơwih ƀong kơnuk kơna jing pô phun, anom bơwih ƀong kơnuk kơna ngă phun akha, jai hrơi jai pơđĭ tui bôh tơhnal bruă mă mơng anom bơwih ƀong tui hơdôm hơdră pơtrun mơng Ping gah. Dăp glăi hmâo phun akha, đing nao hơdôm anom tơdu muan, lup lăp; djă pioh, hơkrŭ đĭ hăng pơđĭ kyar hơdôm bôh anom bơwih ƀong ba glăi bôh tơhnal, hơdôm grŭp, phun akha sang bruă hmâo anăn păn klă. Pơplih pơkra bruă ngă hră pơ-ar kơtang khop, ngă amuñ, bĕ ngă lu mơta hră pơ-ar, ngă khưi khai, kiăng pơtrut kơtang bruă dưm dăp, pơplih phrâo, dăp glăi anom bơwih ƀong. Pơplih phrâo pơhlôm sit nik, ba glăi bôh tơhnal./.

Siu H’ Prăk: Pơblang