Tơlơi phiăn anai hơmâo 13 črăn, hrŏ trun 03 črăn pơhmu hăng hơdră dăp mơ̆ng Tơlơi phiăn lŏn tơnah thun 2024, hơdôm tơlơi pơkă bruă mă ƀơi hơdôm črăn anai hơmâo pơmut amăng hơdôm črăn pơkŏn. Kơ mrô tơlơi pơkă, Tơlơi phiăn hơmâo 115 tơlơi pơkă (Tơlơi phiăn thun 2024 lĕ 260 tơlơi). Ƀơi mông jơnum, hơdôm ding jum, anom bruă pơƀut pơčrông sai hơdôm bruă dŏ hơmâo lu tơlơi pơgôp hiăp phara kah hăng: tơlơi dưi ngă bruă wai lăng lŏn tơnah; kơ bruă kơđŏm hră, kĭ hră, djŏp mơta hră pơ-ar mơ̆ng pô mă yua lŏn; kơ bruă pơhrui lŏn pioh či đĭ kyar bơwih ƀong huă mơnuih mơnam yua klă kơ abih bang mơnuih.

Klah čun mông jơnum, Kơ-iăng khua dêh čar ơi Hồ Quốc Dũng lăi dlăm, anai jing Tơlơi phiăn bơdjơ̆ nao dlăm biă, abih bang djŏp mơta bruă mơ̆ng tơlơi hơdip mơda. Kơ-iăng khua dêh čar jao kơ Ding jum ngă hmua hăng ayuh hyiăng ngă hrŏm hăng hơdôm anom bruă bơdjơ̆ nao, sem lăng tong ten, pơsit hrŏm hơdră ngă bruă amăng Tơlơi phiăn, pơhlom dưi ngă, ngă tŭ yua, plai ƀiă hơmâo anŏ tơnap tơdơi kơ pơtrun mă yua./.