Kơ-iăng khua dêh čar lăng yôm bruă rô nao rai bơwih ƀong huă, sĭ mơdrô plah wah Việt Nam hăng Mi, djă hnong bong kjăp rơnoh pơđĭ kyar klă tơdơi kơ dua bơnah pơđĭ tui bruă ngă giăng mah pŭ ƀăn jing bơnah ngă hrŏm hlom bom. Prăk sĭ mơdrô mơ̆ng dua bơnah amăng 4 blan akŏ thun anai hơmâo 38,6 klai USD, tui hăng anun, gah dêh čar Mi ăt jing anih anom sĭ mơdrô prong hloh mơ̆ng Việt Nam amăng hơdôm blan akŏ thun 2024 anai.

Kơ-iăng khua dêh čar rơkâo: Amăng hră pơkôl ngă giăng mah phrâo, pok rai bruă ngă hrŏm lu bruă kah hăng pơgang hơđong tơlơi pơhing amăng plang internet hăng tơlơi pơhing phrâo hăng mrô, pơjao bruă ngă kơsem min yôm hloh, ngă kjăp tui bruă djru ba gơnam sĭ mơdrô hơdjă, gơnam sĭ mơdrô pơkra ming anŏ pơkĕ apui lơtrik dưm amăng măi mok hăng gơnam điện tử, kơtưn bruă pơsir tơlơi răm ƀăm rơnuk blah wang pioh glăi.