VOV4.Jarai - Čơtlăm lơ 8/7, ƀơi Ƀirô mă bruă Kơnuk kơna, Ding kơna git gai Ping gah dêh čar, Kơ-iăng Khua dêh čar ơi Lê Minh Khái git gai bruă Jơnum Grŭp črâo ba pơkă nua gơnam tam mơng Kơnuk kơna klah čun bruă pơkă nua gơnam 6 blan rơgao, pơsit jơlan gah bruă črâo ba pơkă nua gơnam 6 blan rơnuč thun. Klah čun jơnum, Kơ-iăng Khua dêh čar ơi Lê Minh Khái lăi rơđah, bruă pơkă nua gơnam mơng ră anai truh kơ rơnuč thun khom ngă tui kơđiăng dong, pơplih tañ hăng gơgrong hlâo pơhlôm rah bruă wai lăng nua gơnam amăng sa thun 2022 tui tơhnal pơkă mơng Kơnuk kơna hăng Khua pơ ala mơnuih ƀôn sang jao, mơng anun pơjing phun than gêh gal kơ bruă wai lăng amăng thun pơ̆ anăp anai. Kơ-iăng Khua dêh čar rơkâo hơdôm Ding jum, gơnong bruă plơi pla ƀu dưi lui raih ôh, biă ñu amăng hơdôm hrơi nua ia xăng ia jâu ƀơi rŏng lŏn tơnah akă hmâo gru nam klă ôh; đing nao thâo tơlơi kơsem min pơsit, ba tơbiă jơlan gah git gai djơ̆ hloh./.

Siu H’ Prăk: Pơblang