Pơčrong sai ƀơi mông jơnum ƀing khua ding jum, anom bruă ƀơi dêh čar lăi lĕ, hơdôm blan akŏ thun gơnam tam sĭ mơdrô blơi pơmut ăt djop, rơnoh sĭ mơdrô hơđong, pơblih đĭ trun djơ̆ lăp hăng rơnoh sĭ mơdrô mơ̆ng Khul pơkă nua gơnam sĭ mơdrô dêh čar mơ̆n. Kơ-iăng Khua dêh čar ơi Lê Minh Khái rơkâo, djop ding jum, anom bruă, djop tơring čar ngă tui tŭ yua hăng hmar bruă pơkă nua sĭ mơdrô, kiăng ngă hơđong nua djop mơta gơnam sĭ mơdrô yua kơnuk kơna wai lăng.

Khom pơdjop gơnam blơi, gơnam sĭ mơdrô, prăp lui blơi djop gơnam sĭ mơdrô anŏ mơnuih ƀôn sang kiăng blơi, biă mă ñu braih pơdai, mơnong ƀong huă, gơnam yua rĭm hrơi, bơwih brơi amăng mông lơphet jơnum ngui ƀơi dêh čar, hrơi ngă yang thun phrâo či rơnuč thun hăng akŏ thun. Djop tơring čar ngă tui djơ̆ bruă wai lăng mơ̆ng kơnuk kơna jao djop mơta anăn gơnam sĭ mơdrô tui hăng tơlơi dưi, bruă mă pơkă, kơtưn sem lăng, hyu ĕp ngă tui djơ̆ sĭ mơdrô  hơđong nua, ƀlir hră pơhaih nua sĭ mơdrô tong ten tui tơlơi pơhing rơnoh gơnam sĭ mơdrô.