VOV4.Jarai-Tlam lơ 13/6, ƀơi Anom bruă Kơnuk kơna, ding kơna git gai ping gah dêh čar, Kơ-iăng khua dêh čar, ơi Lê Minh Khái, Khua git gai bruă hơđong nua gơnam sĭ mơdrô dêh čar, jơnum hăng ƀing khua mua kiăng ngă hơđong nua gơnam sĭ mơdrô phun. Klah čun amăng mông jơnum, Kơ-iăng khua dêh čar ơi Lê Minh Khái lăi, amăng 5 blan akŏ thun, tơlơi gleh tơnap ăt dŏ lu, tơdơi kơ klin kheng Covid 19 dưi pơgăn laih, lu bruă mă sĭ mơdrô, pơkra ming pơwơ̆t glăi yơh, anun tơlơi kiăng đĭ lu mơ̆n.

Lơ̆m anun, Kơnuk kơna, Khua dêh čar hăng djop ding jum, anom bruă, djop tơring čar hơmâo pok pơhai lu hơdră tŭ yua. Pơtong glăi bruă mă thun blan rơgao, prăk rơngiă nua ăt kơtang. Boh nik ñu nua ia săng đĭ na nao ngă bơbeč tơnap kơ lu bruă mă pơkra ming bơwih bơwăng. Yua kơ anun, bruă mă git gai ngă hơđong nua sĭ mơdrô mơ̆ng Kơnuk kơna khom ngă mơ̆ng ră anai truh abih thun ăt dŏ tơnap tap. Hăng bruă wai lăng rơnoh sĭ mơdrô mơ̆ng hơdôm mơta gơnam sĭ mơdrô phun tong ten laih, jĕ giăm hăng tơlơi hơdip mơda mơnuih ƀôn sang.

Kơ-iăng khua dêh čar git gai djop ding jum, anom bruă mơ̆ng ră anai truh abih thun ăt khom lăng tui anŏ pơblih đĭ trun nua sĭ mơdrô, kơtưn lăi lui hlâo, pioh hơmâo hơdră git gai hơdeč hmar djơ̆ lăp, pơgang nua gơnam sĭ mơdrô bơwih ƀong huă, djơ̆ tơhnal pơtrun.

Nay Jek: Pơblang