VOV4.Jarai - Mơguah lơ 25/2, ƀơi Ƀirô Kơnuk kơna, Khua apăn bruă Ping gah, Kơ-iăng khua dêh čar ơi Lê Minh Khái git gai mông jơnum khul git gai wai lăng nua sĭ mơdrô mơng Kơnuk kơna kiăng kơ pơčrông sai hơdôm boh than dưi ngă amăng wai lăng nua sĭ mơdrô amăng 2 blan laih rơgao hăng anăp nao bruă git gai wai lăng nua sĭ mơdrô amăng hơdôm blan dŏ glăi thun anai. Lăi pơthâo kơ nua sĭ mơdrô ia săng, ia jâu ră anai, Kơ-iăng Khua ding jum sĭ mơdrô Đỗ Thắng Hải brơi thâo, bruă sĭ mơdrô ia săng, ia jâu amăng rŏng lŏn tơnah tŏ tui pơplih tơnap yua kơ tơlơi rung răng kơplah wah Nga hăng Ukraine, lơ̆m ia săng, ia jâu djă pioh lui ƀơi hơdôm dêh čar hrŏ trun hăng tơlơi kiăng glăk lu tui lơ̆m hơdôm boh dêh čar pok pơhai hơdôm hơdră hơkrŭ glăi bơwih ƀong huă, ră anai nua ia jâu amăng rŏng lŏn tơnah rơgao 100 đôlar Mi sa kơthung hăng ăt dŏ đĭ tui dong. Amăng mông jơnum kiăng kơ lăng glăi tơlơi pơhŭi hlâo kơ nua sĭ mơdrô hơdôm gơnam kiăng hloh. Grup djru bruă Khul git gai wai lăng nua sĭ mơdrô him lăng 3 mơta tơlơi amra ƀuh kơ nua sĭ mơdrô amăng rơwang tal 2 hăng hơdôm blan dŏ glăi thun anai.

Siu Đoan: Pơblang