VOV4.Jarai - Kơ-iăng khua dêh čar ơi Lê Minh Khái hơmâo nao truh laih pơ Anom bruă sĭ mơdrô jar kmar (WTO) ƀơi Geneve, Thụy Sỹ, hăng hơmâo mông mă bruă hăng Kơ-iăng khua anom bruă WTO Trương Hướng Thần. Amăng mông mă bruă, Kơ-iăng khua dêh čar ơi Lê Minh Khái pơsit tong Việt Nam lăng yôm tơlơi ngă gong mơng WTO kiăng pơtrut sĭ mơdrô djop mơta, tơpă sit, djơ̆ tơlơi phiăn, lui hĭ tơlơi ngă tơnap mơng mă jia, pơgăn hĭ ƀing guang dar amăng sĭ mơdrô, čang rơmang WTO tŏ tui djă pioh pran gơgrong git gai kiăng pơtrut sĭ mơdrô amăng rŏng lŏn tơnah tui jơlan hơdră abih bang, bơkơnar hăng pơgôp hơkrŭ glăi hăng pơđĭ kyar amăng bơwih ƀong huă. Amăng hrơi blan bruă kơđi čả hăng bơwih ƀong amăng jar kmar ngă tơnap tap, ơi Trương Hướng Thần čang rơmang Việt Nam tŏ tui pơgôp lu ƀiă dong lơ̆m pơčrông sa amăng jơnum Khua ding jum WTO tal 12 amăng blan 6 pơ anăp anai kiăng ba glăi hơdôm boh tơhnal tong ten, sit biă ñu amăng bruă djru sĭ mơdrô akan hơdang hăng ngă hmua, mơng anun pơtrut sĭ mơdrô amăng tar ƀar rŏng lŏn tơnah.

Siu Đoan: Pơblang