VOV4.Jarai - Mơguah lơ 12/1, ƀơi Hà Nội, Anom pel ĕp kơđi tơlơi kơnuk kơna pơphun Klah čun bruă mă thun 2021 hăng pok pơhai bruă mă thun 2022. Ding kơna git gai bruă Ping gah dêh čar, Kơ-iăng Khua dêh čar ơi Lê Minh Khái hăng Khua Anom pel ĕp kơđi tơlơi kơnuk kơna, ơi Đoàn Hồng Phong gum hrom git gai mông jơnum tui hơdră lăng nao rai mơng ataih ƀơi hơdôm anih anom tô nao rai amăng đơ đam dêh čar ta.

Pơhiăp amăng mông jơnum, Kơ-iăng Khua dêh čar Lê Minh Khái rơkâo, pơ̆ anăp gơnong bruă pel ĕp kơđi tơlơi kiăng kiăo tui git gai mơng Grŭp git gai pơgang pơgăn hưp ƀong kông ngăn, pơsit jơlan gah bruă pel ĕp kơđi tơlơi amăng thun 2022 dưi hmâo Khua dêh čar pơsit kiăng pok pơhai. Ƀơi anăp khom ngă tui truh kih kơ kơčăo bruă hăng pơsit jơlan gah gơnong bruă pel ĕp kơđi tơlơi thun 2022. Gơnong bruă ruah hơdôm bôh yôm, bruă dưi hmâo lu mơnuih đing nao kiăng pok pơhai ngă tui, mơng anun pioh pơplih pơkra glăi, tơdah ƀuh ngă soh pơsir tơpă tui tơlơi pơkă amăng tơlơi phiăn./.

Siu H’ Prăk: Pơblang