VOV4.Jarai - Ƀơi anăp tơlơi hơdôm hrơi jê̆ hăng anai, nua sa dua mơta gơnam tam amăng lŏn ia đĭ, yua nua ia xăng ia jâu ƀơi rŏng lŏn tơnah đĭ, lơ 14/3, ƀơi Anom mă bruă Gong gai dêh čar ta, Ding kơna Khua git gai Ping gah dêh čar ta, Kơ-iăng Khua dêh čar ta ơi Lê Minh Khái git gai bruă jơnum hăng sa dua ding jum, gơnong bruă, tơring čar, ƀôn prong kơ bruă git gai pơkă nua sa dua mơta gơnam tam yôm phăn, kiăng yua hloh kah hăng ia xăng, ia jâu, gơnam tam man pơdŏng, kơmok pruai, gơnam mă mơng đang hmua, gơnam mă yua gah ia jrao. Pơhiăp amăng mông jơnum, Kơ-iăng Khua dêh čar ta ơi Lê Minh Khái pơsit, bruă wai lăng kơjăp hơdôm mơta gơnam tam bơdjơ̆ nao mơng nua ia xăng ia jâu lĕ kiăng biă pioh hmao tlôn pơsir tơlơi mă tŭ đĭ nua ƀu djơ̆ phiăn. Kơ-iăng Khua dêh čar ta lăi rơđah, hăng hơdôm mơta gơnam tam kơnuk kơna pơkă nua, ƀơi anăp amăng hơdôm hrơi ră anai ƀu pel ĕp đĭ nua, biă ñu lĕ hơdôm bruă bơwih kơ bruă hrom. Kơnong hăng hơdôm gơnam kơnuk kơna ƀu pơkă nua, Kơ-iăng Khua dêh čar ta rơkâo wai lăng kơjăp hơdôm bôh than pơjing nua; pel ĕp kơjăp hơdôm tơlơi hmâo gru nam hling hlang, hơdôm gơnam bơdjơ̆ nao prong truh tơlơi hơdip mơnuih ƀôn sang, biă ñu mơnuih ƀun rin. Pơsir tơpă hơdôm tơlơi djă kŏng gơnam kiăng đĭ nua soh hăng tơlơi phiăn./.

Siu H’ Prăk: Pơblang