Kơ-iăng khua dêh čar ơi Lê Minh Khái lăi pơtong: Kơnuk kơna Việt Nam lêng pơsur djop anom bơwih ƀong sĭ mơdrô Hàn Quốc tuh pơ alin phrâo hăng pok prong tuh pơ alin, sit biă ñu amăng hơdôm kiăng đing nao anun lĕ man pơdong anih anom, pơkra pơjing măi mok, gơnam pơkĕ nao rai, măi djă pioh prong, boh thâo sinh học, plơi prong rơgơi; đing nao pơplih mă yua boh thâo phun. Việt Nam lăng yôm bruă Hàn Quốc tŏ tui lăng Việt Nam lĕ “Dêh čar ngă hrŏm” kơ ODA hăng hơdôm akŏ bruă ngă hrŏm pơđĭ kyar mơng Hàn Quốc pơtrut pơđĭ kyar bơwih ƀong huă-mơnuih mơnam ƀơi lu kual, ƀon lan đơ đam dêh čar.

Kơ-iăng Khua dêh čar rơkâo, Hàn Quốc tŏ tui pok prong ƀiă dong hơbô̆ bruă djru ngă pơgiong ƀơi Việt Nam, sit biă ñu amăng bruă kơsem minh pơđĭ kyar (R&D), pơplih phrâo…; čang rơmang kơ-iăng khua dêh čar ngă rah Khua ding jum bơwih ƀong huă, prăk kak Hàn Quốc gum hrŏm hăng hơdôm anom bruă Việt Nam kiăng pơtrut pok pơhai tŭ yua hơdôm boh tơhnal mơng jơnum tal 2 pơ anăp anăp.