VOV4.Jarai - Tŭ ư hăng tơlơi jak iâu mơng Kơ-iăng Khua dêh čar ơi Lê Văn Thành, Kơ-iăng khua git gai Jơnum min kual Mi kô̆ (EC) Frans Timmermans hơmâo rai čuă dêh čar Việt nam dong mơng lơ 17 truh pơ lơ 19/2/2022. Mơguah lơ 18/2, amăng mông jơnum bơkơtuai kơplah wah Kơ-iăng khua dêh čar ơi Lê Văn Thành hăng kơ-iăng Khua git gai Frans Timmermans, dua bơnah hơmâo pơdah pran hok mơ-ak yua măng hrơi blan laih rơgao, mah bơbeč nao kơtang mơng klin Covid-19, tơlơi rô nao rai kơplah wah Việt Nam - Khul pơlir hơbit kual Mi kô̆ (EU) tŏ tui hiam klă.

Mông jơnum

EU ră anai lĕ kual ngă hrŏm amăng bơwih ƀong huă - djru pơđĭ kyar yôm phăn amăng dêh čar Việt Nam, sit biă ñu glăk lĕ kual djru brơi soh sel lu hloh, lĕ kual ba sĭ mơdrô prong tal 3, hăng kual blơi mut prong tal 5 laih dong kual tuh pơ alin prong tal 6 ƀơi dêh čar Việt Nam. Rơnoh pơhrui sĭ mơdrô kơplah wah Việt Nam - EU dưm dưm 57 klai đôlar Mi tơdơi kơ 18 blan pok pơhai tui tơlơi pơkôl sĭ mơdrô rơngai (EVFTA). Dua bơnah tŭ ư tŏ tui pơtrut pơk pơhai sit nik, tŭ yua bruă ngă hrŏm amăng kơđi čar- pơtom hiăp, sĭ mơdrô tuh pơ alin, ngă hrŏm pơđĭ kyar, ngă hmua, ayuh hyiăng, apui lơtrik, wai pơgang rơnuk rơnua.

Siu Đoan: Pơblang