VOV4.Jarai-Lơ 6/4, ƀơi anom bruă Kơnuk kơna, Kơ-iăng Khua dêh čar ơi Lê Văn Thành jơnum lăng nao rai amăng tivi hăng khua mua git gai mơ̆ng dêh čar kơčăo bruă pơkra tơdron rơdêh por jar kmar Long Thành. Tui hăng hră lăi pơthâo mơ̆ng pô tuh pơ alin, tơdơi kơ ngă giong, ruah sang bruă dưi tuh pơ alin hăng kĭ hră ngă bruă lơ 16/3/2022, Phun kông ty rơdêh por Việt Nam (ACV), hơmâo pơphun  brơi tơgŭ mă bruă pong gai, man atur pơdong sang anih tuai jưh, anih dưm rơdêh por.

Tơdơi kơ sa blan mă bruă, atur sang ngă giong laih, hơdôm anih khuer amăng pơdong tơmeh pơsơi tuh simang truh abih blan 3 lĕ hơmâo 2 klăk 500 rơbâo khô̆i lŏn kuai, pơbŭ, lu hloh 500 rơbâo khô̆i tui akŏ bruă jao. Rơnoh prăk tuh pơ alin, truh ră anai Phun kông ty tơdron rơdêh por Việt Nam ACV hơmâo prăp lui djop 36 rơbâo klai pioh apah mă bruă. Ƀơi mông jơnum, ƀing khua mua lăi, bruă čuk pơdăo duh glăi lŏn pioh jao ngă bruă hơmâo pơblih klă mơ̆n, samơ̆ ăt dŏ rơnang, kaih pơkă hăng akŏ bruă jao anun tơnap amăng bruă man pơdong.

Kơ-iăng Khua dêh čar ơi Lê Văn Thành lăi, hơdôm tơhnal bruă pơtrun čuk pơdăo pơklaih ala khom ngă giong, jao abih bruă man pơdong hlâo kơ thun 2025; boh tŭ yua kjăp khom sem lăng hlâo hloh laih anun khom hơmâo hơdră pơsir na nao, pơgăn anŏ ngă huač prăk kăk rơngiă rơngiom soh glăi amăng kơčăo bruă anai.

Nay Jek: Pơblang