VOV4.Jarai - Ƀơi Ƀirô Kơnuk kơna, Kơ-iăng Khua dêh čar ơi Lê Văn Thành git gai jơnum lăng nao rai mơng ataih Khul git gai mơng kơnuk kơna pok pơhai ngă tui akŏ bruă man pơkra jơlan rơdêh đuăi hmar Kơdư-Dơnung gah Ngŏ. Đĭ pơhiăp amăng mông jơnum, Kơ-iăng Khua dêh čar ơi Lê Văn Thành lăi rơđah: Tơlơi pơtrun mơng Jơnum tal 13 ba tơbiă hơnong pơkă gir run mơng anai truh thun 2025 kiăng pơgiong 2.000 km jơlan rơdêh đuăi hmar. Kiăng kơ ngă tui hơnong pơkă anai, Khua pơ ala mơnuih ƀon sang dêh čar hơmâo tơlơi pơtrun hăng lu hơdră yôm phăn, ngă gêh gal hloh kiăng kơ pok pơhai man pơkra jơlan rơdêh đuăi hmar.

Kơ-iăng Khua dêh čar pơsit tong truh thun 2025 pơgiong hơnong pơkă man pơkra dong 2.000 km jơlan rơdêh đuăi hmar tui tơlơi pơkă. Kơ-iăng Khua dêh čar rơkâo Ding jum wai lăng jơlan glông ječ ameč ngă tui hơdôm hră pơ-ar kiăng kơ ruah anom bruă man pơkra, pok pơhai man pơkra 729 km hlâo kơ lơ 31/12; ječ ameč pok pơhai tui tơlơi pơsit jao brơi hơdôm ƀon lan lĕ bruă mă glăi lŏn pioh man pơdong, kah pha hmao tlôn prăk kak kiăng pơhlôm truh lơ 31/12 amra mă glăi 70% lŏn mơnai.

Siu Đoan: Pơblang