VOV4.Jarai - Tlam lơ 11/2, Kơ-iăng khua dêh čar ơi Lê Văn Thành hơmâo jơnum hăng hơdôm ding jum, anom bruă hăng tơring čar kơ bruă prăp lui prăk kăk man pơkra jơlan rơdêh pơđuăi hmar amăng rơwang thun 2021-2025. Tui hăng tơlơi lăi pơthâo mơng Ding jum wai lăng jơlan pơdŭ pơgiăng, amăng 5 kơčăo bruă yôm amăng lŏn ia hơmâo 3 kơčăo bruă yua Ding jum wai lăng jơlan pơdŭ pơgiăng git gai anun lĕ: Jơlan rơdêh pơđuăi hmar Biên Hòa - Vũng Tàu; Jơlan Châu Đốc - Cần Thơ - Sóc Trăng hăng Jơlan Khánh Hòa - Buôn Ma Thuột laih anun kơčăo bruă Jơlan tơkuh nao rai mrô 3 ƀon prong Hồ Chí Minh hrŏm hăng 4 kơčăo bruă grup A. Klah čun ƀơi mông jơnum, Kơ-iăng khua dêh čar ơi Lê Văn Thành lăi rơđah, pơđĭ kyar jơlan rơdêh pơđuăi hmar amra hơmâo tơlơi gêh gal phrâo pơđĭ kyar bơwih ƀong huă mơnuih mơnam mơng abih bang tơring čar ƀon prong hơmâo jơlan rơdêh pơđuăi hmar. Tơdah pơphun ngă tañ, biă ñu amăng bruă čuk pơkra lŏn amra plai mơn huač prăk. Kơ-iăng khua dêh čar brơi thâo, Kơnuk kơna, Khua pơ ala mơnuih ƀon sang dêh čar, biă ñu lĕ Ding jum kơđi čar hơmâo tơlơi pơsit glăi laih mơng anai truh thun 2025 pioh prăk kăk pơkra jơlan rơdêh pơđuăi hmar.

Siu H’Mai: Pơblang