Tơlơi pơtrun ƀu djơ̆ kơnong pơsir hĭ hơdôm tơlơi gun anun lĕ rơngiă prăk tuh pơ alin, pơčruih hrŏm, jum dar tơlơi pơtrun mrô 12 mơ̆ tơlơi pơtrun phrâo kiăng pơplih phrâo hăng anom bơwih ƀong sĭ mơdrô kơnuk kơna anun lĕ tơlơi pơtrun mrô 68 hăng kual bơwih ƀong sĭ mơdrô mơnuih ƀôn sang ngă pô, pơhlôm djơ̆ hơnong pơkă pơplih tui rơnuk 4.0, ngă hiưm pă brơi hơdôm anom bơwih ƀong sĭ mơdrô hrưn đĭ kơtang kiăng pơđĭ kyar tañ hloh, ngă tui tơlơi gơgrong ba jơlan hlâo amăng tơlơi bơwih ƀong huă hăng tơlơi gơgrong phun amăng bơwih ƀong huă.

Pơhiăp pơđut mông jơnum, kơ-iăng khua dêh čar ơi Nguyễn Chí Dũng lăi nao hơdôm tơlơi dưi kah hăng anŏ aka ƀu klă mơng anom bơwih ƀong sĭ mơdrô kơnuk kơna, lăi pơtong tơlơi rơkâo ba tơbiă kiăng pơjing tơlơi pơtrun brơi kual bơwih ƀong sĭ mơdrô kơnuk kơna lĕ kiăng hơmâo hơdôm črăn phrâo kiăng hrưn đĭ amăng rơnuk phrâo, ƀu djơ̆ kơnong đing nao pơsir hĭ bruă bơdjơ̆ nao rơngiă prăk tuh pơ alin, pơčruih ngăn, kah gưl, prăk apah đôč ôh mơ̆ ăt kiăng lăng nao djop mơta dong.