VOV4.Jarai-Mơguah lơ 17/3, ƀơi sang bruă kơnuk kơna, ding kơna ding jum kơđi čar, Kơ-iăng Khua dêh čar ơi Phạm Bình Minh git gai jơnum lăng nao rai amăng tivi pioh hmư̆ djop ding jum, anom bruă lăi pơthâo bruă ngă tui hơdrôm hơdră bruă dêh čar pơkă mơ̆ng thun 2021-2025, dưi hơmâo Khua dêh čar kĭ laih jing hơdră tơhnal pơtrun bơwih ƀong huă mơnuih mơnam dêh čar kual mơnuih djuai ƀiă hăng čư̆ siăng; Hơdră dêh čar pơkă brơi pơhrŏ ƀun rin hơđong kjăp laih anun dêh čar pơkă man pơdong plơi pla phrâo.

Klah čun ƀơi mông jơnum, Kơ-iăng Khua dêh čar ơi Phạm Bình Minh rơkâo, Jơnum min djuai ania, Ding jum Bruă mă Tơhan rơka hăng Mơnuih mơnam laih anun Ding jum Bruă hmua hăng Pơđĭ kyar plơi pla tañ ngă pơgiong hơdôm tơlơi gêh găl, tơhnal pơtrun amăng blan 3 pioh pơdah thâo hăng Jơnum min apăn bruă pơ ala mơnuih ƀôn sang dêh čar brơi pơsit pơpha prăk pok pơhai hơdră dêh čar pơkă. Kơ-iăng Khua dêh čar lăi rơđah, bruă prăp lui tañ tơlơi phiăn pơkă kơ bruă mă kiăng biă mă pioh pok pơhai tŭ yua djop ring bruă hơdră bruă dêh čar pơkă amăng thun blan pơ anăp.

Nay Jek: Pơblang