VOV4.Jarai - Mơguah lơ 1/8, Kơ-iăng khua dêh čar ơi Phạm Bình Minh git gai jơnum Grup mă bruă mrô 1 mơng Khua dêh čar, pơtrut kiăng brơi prăk tuh pơ plai pơkra ring bruă kơnuk kơna ƀơi 7 ding jum, anom bruă gơnong dlông hăng ƀơi 4 boh tơring čar. Tui hăng tơlơi lăi pơthâo mơng Ding jum dưm dăp bruă mă hăng tuh pơ plai, Khua dêh čar jao mrô prăk kơnuk kơna rơbêh 24.000 klai kơ 7 boh ding jum, anom bruă gơnong dlông hăng 4 boh tơring čar, samơ̆ truh ră anai kơnong brơi hơmâo năng ai 15% mrô pơkă.

Kơ-iăng khua dêh čar ơi Phạm Bình Minh git gai mông jơnum.

Klah čun glăi mông jơnum, Kơ-iăng khua dêh čar Phạm Bình Minh lăi nao tơlơi phara amăng bruă brơi nao prăk kăk tui hluai kơ tơlơi ngă bruă mơng rim ding jum, anom bruă. Tơdah hơmâo bruă ƀu dưi brơi prăk thơ, hơdôm ding jum, anom bruă, gong gai plơi pla lăng glăi tañ, rơkâo ba nao mrô prăk kơ hơdôm ding jum, anom bruă pơkŏn glăk kiăng prăk ngă bruă. Kiăng jŭ yap abih bang, prăp lui anih ngă bruă hlâo, khŏm ngă hrŏm hăng hơdôm ding jum đah mơng hơmâo anih pioh ngă kơčăo bruă.

Siu H’Mai: Pơblang