VOV4.Jarai-Tŭ ư tơlơi jak iâu mơ̆ng Kơnuk kơna dêh čar Khač, lơ 16/9, ơi Phạm Bình Minh, Kơ-iăng Khua dêh čar nao jơnum hrom hăng đĭ pơhiăp pok jơnum ngă lơphet sang čơ ASEAN-Khač hăng jơnum khua mua sĭ mơdrô tuh pơ alin ASEAN-Khač iâu klah čun CAEXPO hăng CABIS tal 19 ƀơi Nam Ninh, kual wai lăng mă pô djuai ania Choang, tơring čar Quảng Tây, dêh čar Khač tui hơdră mă rup video hlâo. Pơhiăp amăng mông pok jơnum, ơi Phạm Bình Minh lăng yôm bruă dua bơnah akŏ pơjing ngă hrom hlom bom yua tơlơi rơnuk rơnua, hơđong, pơđĭ kyar kjăp; ASEAN hăng Khač ăt jing bơnah ngă hrom sĭ mơdrô prong tơdruă, rơnoh prăk sĭ mơdrô nao rai dua bơnah thun 2021 truh kơ 669 klai USD.

Kơ-iăng Khua dêh čar, ơi Phạm Bình Minh rơkâo kơnuk kơna dêh čar Khač ngă gêh găl blơi pơmut lu hloh gơnam boh čroh đang hmua mơ̆ng Việt Nam ăt kah hăng djop dêh čar amăng kual ASEAN, găn rơgao amăng lŏn ia Việt Nam pơtruh brơi; pơtrut ngă hrom amăng bruă pơblih phrâo, pơblih yua mrô, bơwih ƀong huă hăng mrô, sĭ mơdrô hăng điện tử, kơtưn ngă hrom amăng bruă pơđĭ kyar mơtah mơda, hơđong kjăp.

Nay Jek: Pơblang