VOV4.Jarai - Amăng hơdôm hrơi rai čuă hăng mă bruă ƀơi Việt Nam, tlam lơ 23/2, ƀơi Ƀirô Kơnuk kơna, Kơ-iăng khua dêh čar ơi Phạm Bình Minh tŭ jum Khua djru bruă mơng Khua mir sir Mi ơi John Kerry. Amăng mông bưp, Kơ-iăng khua dêh čar ơi Phạm Bình Minh pơdah pran hok mơ-ak ƀơi anăp bruă pơđĭ kyar rô nao rai ngă hrŏm djop mơta kơplah wah Việt Nam - Mi amăng djop bruă, amăng anun hơmâo rơnoh pơđĭ kyar sĭ mơdrô dua bơnah thun 2011 truh pơ 111 klai đôlar Mi. Kơ-iăng khua dêh čar lăng yôm hăng pơpŭ hơdôm tơlơi gir run hăng tơlơi gum pơgôp mơng ơi John Kerry amăng bruă ngă bơmơ-ak glăi hăng pơtrut rô nao rai Việt Nam - Mi amăng hơdôm pluh thun laih rơgao; hluai tui tơlơi yôm phun ră anai, rơkâo dua bơnah tŏ tui kơtưn ngă hrŏm kiăng pơtrut rô nao rai dua bơnah Việt Nam - Mi pơđĭ kyar hơđong, sui thun, sit nik hăng tŭ yua. Ƀrô tal anai, Kơ-iăng khua dêh čar ăt pơpŭ bơni Kơnuk kơna Mi truh ră anai hơmâo djru brơi Việt Nam abih tih 29 klăk 100 rơbâo liều vaccine pơgang klin Covid-19; čang rơmang Mi tŏ tui đing nao djru brơi Việt Nam amăng bruă pơtô pơjuăt, ia jrao, djru ană mơnuih, bơwih ƀong huă mă yua boh thâo phrâo….

Siu Đoan: Pơblang