VOV4.Jarai -Amăng hơdôm hrơi nao jơnum kơ bruă pơgi kơdih kual Asia, tlam (25/5), ƀơi Sang anih jưh pơ ala dêh čar Việt Nam pơ Japan, Kơ-iăng khua dêh čar ơi Phạm Bình Minh bưp Khua git gai tơring čar Gunma, ơi Yamamoto Ichita, Khua git gai tơring čar Kanagawa, ơi Kuroiwa Yuji, mông bưp pơphun jê̆ giăm mơ-ak hăng khua mua Sang anih jưh pơ ala dêh čar Việt Nam pơ Japan, Khul mơnuih rơgơi kơhnâo Việt Nam ƀơi Japan.

Amăng mông bưp kơ-iăng khua dêh čar ta čang rơmang Khua git gai dua boh tơring čar ngă gêh gal brơi hơdôm anom bơwih ƀong sĭ mơdrô tuh pơ alin ƀơi Việt Nam, đing nao ƀing čơđai glăk hrăm hră hăng hrăm bruă mơng Việt Nam glăk dŏ hơdip amăng tơring čar. Laih dong ƀuăn Việt Nam amra ngă gêh gal brơi hơdôm anom bơwih ƀong sĭ mơdrô Kanagawa. Kanagawa lĕ tơring čar hơmâo hơdôm tơlơi dưi prong gah ia jrao, yua anun, kiăng pơtrut ngă hrŏm amăng bruă ia jrao, biă mă ñu lĕ pơjrao brơi mơnuih ruă kraih lĕ tơlơi čang rơmang prong hloh mơng Việt Nam.

Siu Đoan: Pơblang