Kơ-iăng Khua dêh čar ơi Trần Hồng Hà pơtrun hiăp kơ khua mua ƀôn prong Hải Phòng khom pơpha bruă mă krăo lăng tong ten, pơhlôm hlâo tơlơi truh ječ ameč kơthel ngă, pôr pơthâo tơlơi pơhing anăp kơthel pưh nao, anăm ngă amưng ôh hăng kơthel anai. Kơ-iăng Khua dêh čar lăi, mah ƀôn prong Hải Phòng hơmâo laih hơdră dăp hlâo prăp lui pơhlôm kơthel; samơ̆ ăt khom prăp lui mă bruă na nao pioh pơsir mơtam djop tơlơi hơmâo amăng mông ječ ameč kah hăng thăm apui, ia yua tơ̆i đưn, prăp lui hơdră či pơhiăp nao rai tơlơi pơhing hăng djop sang bruă tơdah hơmâo tơlơi sat truh.

Tui hăng anom bruă wai lăng akŏ tli bơnư̆ pơkong ia gah Ding jum bruă hmua hăng pơđĭ kyar plơi pla, bruă bong glăi hăng kơthel mrô 3 anai, yap truh tlam tom brơi, lơ 6/9, djop tơring čar, ƀôn prong hơmâo: Quảng Ninh, Hải Phòng, Thái Bình, Nam Định, Ninh Bình hơmâo pơđuăi laih 37 rơbâo 188 čô mơnuih dŏ amăng bruă rơnưh ngă gruh rông akan čơnăng ƀơi ia rơsĭ, ia krông, ter hang ia rơsĭ, anih plung dơnung, mơnai ia krông, brơi nao dŏ pơ anih rơnuk rơnua hơđong. Ƀing tơhan pơgang guai dêh čar ƀơi ia rơsĭ hơmâo hyu sem lăng, pơtô brơi kơ rơbêh 51 rơbâo boh ƀattô, song nan hăng rơbêh 220 rơbâo čô mơnuih mă bruă thâo kơ tơlơi pơhing anăp kơthel pưh nao kiăng prăp lui hơdră ĕp anih glăi kơđap rơnuk rơnua, truh ră anau abih bang ƀattô glăi jưh kơđăp ƀơi anih hơđong soh. Hơdôm tơring čar, ƀôn prong mơ̆ng Quảng Ninh truh pơ Nghệ An hăng Quảng Bình ngă tui tơlơi kŏm trun nao pơ ia rơsĭ mơ̆ng lơ 6/9.