Kơ-iăng khua dêh čar ơi Trần Hồng Hà pơpŭ bơni rơwang mă bruă mơng yă Angela Pratt ƀơi Việt Nam hăng lăng yôm tơlơi gơgrong gum bruă mơng anom bruă ia jrao rŏng lŏn tơnah amăng hrơi blan jar kmar glăk dong ƀơi anăp kơ lu tơlơi lông mơng klin kman. Amăng anun, tơlơi gum djru mơng WHO pơgôp djru Việt Nam ngă pơgiong bruă pơgang klin Covid-19 hăng jing sa boh dêh čar tañ pok glăi bah amăng tơdơi kơ abih klin. Pơčrông sai kơ tơlơi kiăng mơng gơnam tam, ia jrao, vaccine klă hloh, nua gap ƀrô, Kơ-iăng khua dêh čar ơi Trần Hồng Hà rơkâo anom bruă ia jrao rŏng lŏn tơnah tŏ tui gum djru lu ƀiă dong kơ Việt Nam, sit biă ñu lĕ vaccine dŏ kơƀah amăng jơlan hơdră tlâ̆o pok prong.

Yă Angela Pratt pơsit tong, WHO hăng gong gai Việt Nam hơmâo tơlơi rô nao rai kjăp, tŭ yua amăng sui thun, anai lĕ akŏ phun kiăng dua bơnah tŏ tui pơsir hĭ hơdôm bruă tơnap tap amăng bruă ia jrao tui ră anai. Pơ anăp anai, WHO amra tŏ tui gum hrŏm kjăp hăng Ding jum ia jrao kiăng kơtưn mă yua vaccine gah jơlan hơdră tlâ̆o vaccine pok prong.