Tui đăo lăng hlâo, mơmŏt lơ 17, mơguah lơ 18/7, kơthel mrô 1 amra mut rai lŏn ia ta. Anai lĕ kơthel pưh kơtang biă mă amăng 5 thun giăm anai. Kiăng pơhlôm lui hlâo, mơng 12 mông yang hrơi dong lơ 17/7, hơdôm boh tơring čar Quảng Ninh, Nam Định kŏm ƀattô tơbiă hyu, laih dong pơdơi hĭ bruă pơdŭ pơgiăng, čơkă tuai ƀơi hơdôm anih bơwih brơi tuai čuă ngui.

Mơng pel ĕp ƀơi hơdôm kual hŭi rơhyưt hăng ƀơi hơdôm anih rông akan hơdang amăng hơdôm boh ƀon lan, him lăng amra hơmâo giăm 30 rơbâo čô mơnuih arăng ba đuăi hơđăp. Ling tơhan Quân khu 3, Quân khu 4 hơmâo ngă hăng glăk đing nao djru brơi mơnuih ƀon sang kal pơgang sang anŏ; ba đuăi hơdôm anih rông akan hơdang ter ha ia; lăi pơthâo brơi djop ƀattô pot glăi pơ anih hơđăp hăng dưm dăp ƀattô ter hang ia rơsĭ. Pơđut mông jơnum, Kơ-iăng khua dêh čar ơi Trần Lưu Quang tŭ yap hơdôm tơlơi gơgrong mơng djop ƀon lan amăng bruă prap lui pơhlôm hlâo kơthel, laih dong rơkâo djop ding jum, gơnong bruă hăng ƀon lan anăm pơtah tai, ngă tui khut khăt tui kông điêng mơng Khua dêh čar amăng pơhlôm hlâo kơthel mrô 1.