Tui tơlơi pơhing mơng jơnum, rơwang thun 2021-2025, hơdôm boh tơring čar kual Dap kơdư hơmâo gơnong glông jao rơbêh 11.700 klai prăk kiăng ngă tui 3 jơlan hơdră tui hơnong pơkă dêh čar. Mrô rơnoh prăk anai rơbêh 11,73% mrô rơnoh prăk tuh pơ alin pơđĭ kyar mơng gơnong glông brơi 3 jơlan hơdră tui hơnong pơkă dêh čar amăng đơ đam dêh čar. Kơnong thun 2022, gơnong glông kah pha rơbêh 3.878 klai prăk hăng hơdôm boh tơring čar kual Dap kơdư hơmâo jao rơbêh 870 klai prăk ngăn drăp ƀơi ƀon lan kiăng ngă tui hơdôm jơlan hơdră anai.

Truh lơ 31/12/2022, hơdôm boh tơring čar amăng kual phrâo jao prăk čan 34% mrô prăk mơng gơnong glông, (aset ƀiă rơnoh prăk jao dưm dưm đơ đam dêh čar). Blan 1/2023, hơmâo 3 amăng 5 boh tơring čar anun lĕ Kon Tum, Lâm Đồng, Dak Nông pơgiong bruă kah pha prăk amăng ha thun. Mơng tơlơi sit nik mơng hơdôm tơlơi gun găn ƀơi kual Dap kơdư, khua mua hơdôm boh tơring čar hơmâo ba tơbiă sa, dua hơdră bruă kiăng kơnuk kơna sem lăng, Kơ-iăng khua dêh čar ơi Trần Lưu Quang rơkâo hơdôm boh ƀon lan tañ pơgiong bruă jao prăk, mă yua lăp djơ̆ amăng rĭm jơlan hơdră; rơkâo hơdôm anom bruă, ding jum, gơnong bruă ngă tui mơtăm bruă pel ĕp, pơgiong hơdôm tơlơi pơkă dŏ kơƀah. Gah hơdôm boh ƀon lan, kơ-iăng khua dêh čar rơkâo tŏ tui pơtrut kơtang hơdôm bruă glăk ngă; kơtưn amăng gum hrŏm  kơplah wah hơdôm ƀon lan hăng ding jum, gơnong bruă laih dong bruă gum hrŏm amăng hơdôm anom bruă ƀơi rĭm boh ƀon lan lơ̆m pok pơhai ngă tui.