Amăng mông bưp, dua bơnah hơmâo lăi dơlăm nao tơlơi pok pơhai sa, dua akŏ bruă ODA ƀơi Việt Nam, Kơ-iăng khua dêh čar ơi Trần Lưu Quang pơsit tong Kơnuk kơna Việt Nam glăk gir run pơsir hĭ tơnap tap, gun găn kiăng pơtrut hơdôm akŏ bruă anai, rơkâo gah Japan djru ODA brơi sa, dua ring bruă jơlan rơdêh treng, pơplih yua boh thâo phrâo, pơplih mơtah hăng bong glăi ayuh hyiăng pơplih sat ƀơi Việt Nam.

Kơ-iăng khua JICA lăi pơthâo hăng Kơ-iăng khua dêh čar ơi Trần Lưu Quang kơ jơlan gah djru ODA phrâo brơi Việt Nam pơ anăp anai, hơmâo hơdôm rơnoh prăk wai pơgang  tơlơi hơmâo tơlơi rung răng amăng bruă ia jrao, tơlơi truh sat, djru čan prăk hluai tui ƀing gong jơlan hăng djru brơi prăk kơ hơdôm anih anom kiăng hơdôm kual bơwih ƀong hơjăn pơphun ngă tui hơdôm akŏ bruă man pơdong anih anom.