VOV4.Jarai - Čơtlăm lơ 8/2, Kơ-iăng Khua dêh čar ta, ơi Vũ Đức Đam, Kơ-iăng Khua Grŭp črâo ba pơgang pơgăn klin Covid-19 dêh čar ta git gai bruă jơnum hăng khua Ding jum ia jrao, hơdôm mơnuih juăt bruă ia jrao, khua mua sa dua bôh tơring čar, ƀôn prong kơ bŏng glăi lom thâo hmâo F0 amăng sang hră. Kiăo tui anun, ƀing juăt bruă leng kơ pơsit tơhnal pơkă pơgang, pơgăn klin ba glăi bôh tơhnal tui jơlan gah guang dar anet lom thâo hmâo F0 amăng anih hrăm, pơhlôm sang hră ăt pok bah amăng pơhlôm mơn. Amăng mông jơnum ƀing juăt bruă ia jrao ăt lăi mơn, khă hmâo tlâ̆o vaccine laih, samơ̆ bruă pơgang pơgăn klin lăi hrom ăt khom pơmin nao mơn tơlơi sat hloh, hăng bruă hmâo djuai kơman phrâo pơplih amra tañ  hloh. Lom 20 klăk čô čơđai sang hră ha amăng plĕ nao sang hră thơ khom pơmin hlâo bruă mrô čơđai ƀă kơman klin Covid-19 đĭ lu. Kơ-iăng Khua dêh čar ta, ơi Vũ Đức Đam pơsit, bruă pơgăn klin Covid-19 ba bruă pơgang tơlơi suaih pral mơng mơnuih ƀôn sang nao hlâo, biă ñu amăng anun lĕ pơgang tơlơi suaih pral mơng čơđai muai. Kơ-iăng Khua dêh čar ta ơi Vũ Đức Đam ăt rơkâo mơn Ding jum ia jrao pel ĕp glăi hăng hmâo jơlan gah pơtô brơi pơjrao tơlơi ruă klin kơ čơđai ƀă kơman klin Covid-19, hrom hăng anun hmâo pơtô brơi črâo ba kơtưn pơgang Anom pơjrao tơlơi ruă čơđai muai ƀơi hơdôm bôh Sang ia jrao amăng đơ đam dêh čar./.

Siu H’ Prăk: Pơblang