VOV4.Jarai - Lơ 11/3, ƀơi Hà Nội, Ding jum kông an pơphun ngă lơphet 25 thun hrơi gru grua tơhan pôlih hyu hơduah ĕp kơđi mơnuih ngă soh gah ma túy (12/3/2022) hăng čơkă Miđai Tơlơi dưi ngă prong mrô Sa. Găn rơgao rơbêh 20 thun ngă bruă, tơhan Kông an hơduah ĕp mơnuih ngă soh gah ma túy jai hrơi kơtang hloh hăng kơjăp bruă. Boh than ba glăi, mơng thun 1997 truh ră anai, tơhan pôlih hơduah ĕp kơđi ma túy amăng dêh čar ta hơmâo ƀuh, mă pơkŏng rơbêh 290 rơbâo tơlơi ngă soh, rơbêh 460 rơbâo čô mơnuih, mă pơhrui glăi rơbêh 5 tơn jrao ngă gơñ, giăm 82 tơn heroin, giăm 22 tơn ma túy djŏp mơta; lu gơnam hơmâo nua hơdôm rơbâo klai prăk nôp glăi kơ Kơnuk kơna....Pơhiăp ƀơi mông ngă lơphet, Kơ-iăng khua dêh čar ơi Vũ Đức Đam lăi rơđah, bruă pơgang pơgăn ma túy ƀu kơnong bruă mă mơng tơhan pôlih hơduah ĕp mơnuih ngă soh gah ma túy đôč ôh mơ̆, tơlơi anai khŏm kiăng abih bang anom bruă bơdjơ̆ nao gum ngă. Kơ-iăng khua dêh čar kiăng amăng hrơi blan pơ anăp, tơhan pôlih hơduah ĕp mơnuih ngă soh ma túy kiăng pơƀut ngă klă hloh dong bruă lăi pơthâo hăng ping gah, gong gai djŏp gưl, pơtrut tui bruă git gai, đah mơng pơƀut abih pran kơtang mơng abih bang anom bruă čar hăng abih bang mơnuih ƀon sang gum ngă bruă pơgang pơgăn jrao ma túy.

Siu H’Mai: Pơblang