VOV4.Jarai - Tal pơplông abih anih 12 thun 2022 lĕ tal pơplông yôm phăn hơmâo Kơnuk kơna đing nao biă mă. Amăng mơguah lơ 7/7, Kơ-iăng Khua dêh čar ơi Vũ Đức Đam hơmâo nao pel ĕp ƀơi anih pơphun pơplông ƀơi sang hră gưl dua Nghĩa Tân, Cầu Giấy, Hà Nội, pơ alum pran jua ƀing čơđai hăng ƀing amĭ ama. Tơdơi kơ ƀing čơđai tơbiă mơng anih pơplông tơlơi hrăm Ngữ Văn, Kơ-iăng Khua dêh čar ơi Vũ Đức Đam hơmâo nao čuă jơmư hăng pơ alum pran jua ƀing čơđai bơdjơ̆ nao bruă prap lui anih pơplông hăng bruă pơkra tơlơi pơplông … Kơ-iăng Khua dêh čar ăt hơmâo nao čuă ƀing amĭ ama ƀing čơđai kiăng pơ alum pran jua, mơng anun kiăng kơ prap brơi čơđai nao pơplông klă hloh. Lăng yôm bruă pơphun pơplông abih anih 12 thun 2022 ƀơi ƀôn prong Hà Nội hăng hơdôm ƀon lan amăng đơ đam dêh čar, Kơ-iăng Khua dêh čar ơi Vũ Đức Đam pơtă, bruă ngă tui tơlơi pơkă kiăng pơplông tơpă sit; laih dong ngă gêh gal brơi hloh kơ ƀing čơđai. Sit biă ñu, hăng ƀing čơđai nao pơhlôm kaih ƀudah ngă soh hăng tơlơi pơkă kiăng kơ lăng glăi tong ten, djơ̆ tơlơi sit nik, anăm brơi ƀing čơđai glêh tơnap yua mơng hơdôm tơlơi ngă soh ƀu hơmâo thâo.

Siu Đoan: Pơblang