Amăng mông mă bruă Kơ-iăng Khua dêh čar ta, ơi Bùi Thanh Sơn hmư̆ laih khua git gai tơring čar Cao Bằng lăi pơthâo glăi ƀơƀiă kơ tơlơi răm rai yua kơ kơthel ngă, biă ñu kơthel tal 3. Kiăo tui anun, hơjan ia ling dăo mơ̆ng akô̆ thun truh ră anai hmâo ngă laih Cao Bằng răm rai rơbêh kơ 248 klai prăk, kơnong kơ kơthel tal 3 ngă laih 45 čô mơnuih djai, 15 čô mơnuih rơka hăng 8 čô mơnuih akă ĕp ƀuh, giăm hmâo 1.500 bôh sang dô̆, rơbêh kơ 1.600 ektar đang hmua răm rai.

Kơ-iăng Khua dêh čar, Khua Ding jum pơtom hiăp dêh čar ơi Bùi Thanh Sơn rơkâo tơring čar Cao Bằng tañ hyu ĕp dong mơnuih rơngiă yua kơ ia ling dăo ngă; hrŏm hăng anun tañ pơsir anô̆ răm rai, biă ñu tơlơi ƀu thâo rô nao rai ră anai. Tơring čar khom ngă klă bruă djru gơnam ƀong huă, ia yua, gơnam yua kơ mơnuih ƀôn sang kual lŏn tơhroh hăng mơnuih ƀôn sang ƀu thâo nao rai, ia guang dar./.