VOV4.Jarai - Pơhiăp amăng mông Jơnum tui tơđar tal 52 Bơkơtuai tơlơi bơwih ƀong rŏng lŏn tơnah (pơphun ƀơi Davos, Thụy Sĩ), Kơ-iăng Khua dêh čar ta ơi Lê Minh Khái lăi rơđah anô̆ bơdjơ̆ nao mơng klin Covid-19 hăng tơlơi rung răng bruă kơđi čar glăk ngă bơdjơ̆ nao akă ƀu hmâo ôh mơng hlâo amăng bruă blơi sĭ, nua gơnam tam hăng tơlơi pơlir hơbit bruă briah piang đơ đam rŏng lŏn tơnah.

Kơ-iăng Khua dêh čar ta ơi Lê Minh Khái nao pơhmư̆ pok phun Jơnum WEF 52

Kơ-iăng Khua dêh čar ta lăi đĭ 5 mơta ba tơbiă yôm phăn, amăng anun hmâo bruă kơtưn gum hrom jar kơmar, lu bơnah gum hrom, pơtrut bruă mă mơng khul grŭp jar kơmar kiăng pơsir tơlơi bơdjơ̆ nao hơđong braih piang đơ đam rŏng lŏn tơnah, amăng anun kiăng pơhlôm bruă pơlir hơbit braih piang hluh gah, gah lui anô̆ gun bruă sĭ mơdrô hăng braih piang, djru prăk kơ hơdôm bôh dêh čar glăk đĭ kyar, pơtrut hơdră gum hrom 3 bơnah mơ̆ Việt Nam pok pơhai ba glăi bôh tơhnal hăng hơdôm bôh dêh kual Ơi Jŭ hăng kual Mỹ Latinh; pơplih tơlơi pơmin, pơčeh phrâo pran pơtrut phrâo kiăng pơtrut pơđi kyar mơng bruă đang hmua hăng ngă rai braih pơdai, biă ñu mă yua hơdră măi mok phrâo tal 4./.

Siu H’ Prăk: Pơblang